Everton-in Spurs 5-4 in an hneh

Goodison Park-ah goal kua zet a lut a, Everton-in Jose Mourinho enkawl Tottenham Hotspur 5-4 in an hneh. Carlo Ancelotti hoten FA Cup quarterfinal an lut a, Spurs erawh match hnuhnung pangaah vawi li an chak lo.

Nilaini zan inkhel hmuhnawm bikah hian hun pangngaiah 4-4 in an inhnehtawk. Toffees tan Richarlison-a'n goal hnih a khung bakah Dominic Calvert-Lewin leh Gylfi Sigurdsson ten goal khat ve ve an khung.

Spurs tan Davinson Sanchez-a'n goal hnih a khung a, Erik Lamela leh Harry Kane ten goal khat ve ve an khung. Extra time-ah Everton tan Bernard-a'n a khung a, mualneitu an vannei ta zawk.

Minute thumna lekah Son Heung-Min-a corner pet chu Davinson Sanchez-a'n a tauh lut nghal a, Spurs-in bul an ṭan ṭha. Goal hmuh tur a awm lawk lo a, minute 36-naah Calvert-Lewin-a'n Sigurdsson-a ball pek chu box chhungah pet nghal pawpin Spurs keeper Hugo Lloris-a'n a tih tur a ti tawk lo.

Minute hnih hnuah Calvert-Lewin-a flick mawi zet chu Richarlison-a'n hmang ṭangkaiin box pawn aṭang chiahin a khung. Minute 43-naah Pierre-Emile Hojbjerg-a'n Calvert-Lewin lakah penalty a chawi a, Sigurdsson-a'n goal-ah a chantir a, Everton-in 3-1 in hma an hruai ta zawk.

First half injury time-ah Erik Lamela-a'n Spurs siphurh a sut ṭhen a, second half minute 47-naah Davinson Sanchez hmangin Spurs-in sipurh an sut zo. 3-3 a nih hnuah Everton-in goal an khung hmasa leh a, Richarlison-a'n minute 68-naah angle zim takin aṭangin a pet goal.

Jose Mourinho-a'n chak a duh lantirin second half-ah Harry Kane a luhtir a, minute 83-naah Son-a cross ṭha tak chu Kane-a'n a tauh goal. Hun pangngaiah 4-4 a ni a, extra time hmangin chak zawk zawn a ngai.

Extra time second half-ah Sigurdsson-a'n fing takin Spur tlarhnung a pet khum a, substitute Bernard-a'n minute 97-naah chakna goal a khung. Goal kua luh zanah  Icelandic midfielder Sigurdsson-a'n assist vawi thum a nei.

Everton assistant boss Duncan Ferguson chuan, "Tottenham-in bul an ṭan ṭha zawk a, keini lamin tha kan thlah duh lo. Inkhel danglam tak a ni a, a tawp thlengin boruak a sang hle. FA Cup kan chawi hnuhnun ber aṭangin kum 25 a liam leh tawh a, chuvangin nomawi chawi leh ngei kan duh. Premier League-a chet ṭhat chu kan duh a, FA Cup nomawi hi kan duh chu a ni," tiin champon theih an inbeisei.

Tottenham boss Jose Mourinho chuan, "Ṭan lam nei lo tan chuan a hmuhnawm khawp ang. Kei erawh ṭan lam nei ka ni. Goal li kan khung a nih chuan kan chak tur a ni a, kan khelh dan thlirin awlsam taka chak tur kan ni. Attacking football kan khel a, tlarhnung lam an tisual nasa thung. Chutihrualin ka player-ten an theihna zawng zawng an chhuah," tiin an phu ang result an hmuh loh thu a sawi.