Champion lai Kenin hnehtu Kanepi

Grand Slam dang ang bawkin beisei loh result kan hmu leh ta. Australian Open hmeichhe singles champion lai Sofia Kenin chu seeded pawh chang phak lo Kaia Kanepi hneh loin third round-ah a zin kawng a tawp.

Inkhel dangah Ashleigh Barty tan harsatna a la awm lo thung. World number 1 hian match hnih a khelh tawh chinah set a la hloh lo a, third round-ah Ekaterina Alexandrova nen an inhmachhawn leh ang.

Nimin Margaret Court Arena a inkhelah seeded palina Kenin-i'n beisei a phak lo. Kum 35 mi Kanepi nen darkar khat leh minute li an inkhelh hnuah 6-3, 6-2 in a chak lo - Estonian nula hian vawi 22 ngawt winners a vaw chhuak.

Kanepi hi mi hriat hlawh tak a ni ngai lo, a tawn san lai ber pawhin world number 15 a ni hram. Tun dinhmunah world number 65 niin rin hlawh lo tak chungin inelna a hmachhawn, match hnihah set hloh loin a chak thei si!

A thlen san ber ṭuma French Open quarterfinal khel ve tawh Kanepi chuan, "Kumin chu player dang ang lo takin match ka khel hnem, round hmasa zawka ka chak khan Kenin nen kan inhmachhawn dawn tih ka hria, player ṭha tak laka hnehna ka chang zui hi a mak," a ti.

Nimin inkhel dangah Ashleigh Barty chuan tualchhung nula Daria Gavrilova chu 6-1, 7-6 (9-7) in a hneh. World number 1 hian hnehna chang tur hian darkar khat leh minute 32 bak hun a mamawh lo.

Barty hian a match hmasa zawkah Danka Kovinic chu game khat pawh hloh lo chungin a lo hneh tawh. Gavrilova lakah pawh a chungnung leh hle a, set khatnaah game khat bak a hloh lo; set hnihnaah pawh 5-2 in hma a hruai fal hman. 

Tualchhung nula Gavrilova a tlawm mai duh bik lo. Set point hial a hmu ve leh thei a, mahse player ṭha zawk Barty a chesual duh lo. Hliam leh hri leng vanga kum khat deuh thaw a inkhelh loh hnua rawn kir chauh ni mah se a thiam a la theihnghilh lo.

Seeded parukna Karolina Pliskova chuan American player Danielle Collins lakah 7-5, 6-2 in hnehna a chang. Pliskova hian third round-ah chuan amah ang bawka Czech nula Karolina Muchova a hmachhawn leh dawn a ni.

Tawnhriat ngah tawh Svetlana Kuznetsova a tla. Russian player hi seeded 11-na Belinda Bencic lakah 7-5, 2-6, 6-4 in a chak lo. Hnehna changtu Bertens hian Lin Zhu 7-6 (10-8), 6-1 a hnehtu seeded 18-na Elise Mertens a hmachhawn leh ang.

Nilaini zan khan champion tura rinkai zinga mi Simona Halep chuan fiahna a lo paltlang tawh. Seeded pahnihna Halep hi Ajla Tomljanovic nen an inkhel a, set hnuhnung berah 5-2 in hniam zawk hman mah se game hnuhnung panga lain 4-6, 6-4, 7-5 in a chak hram.