Giannis-a point 47 a tawk lo!
NBA Most Valuable Player Giannis Antetokounmpo-a'n nimin zing khan point 47 ngawt nei mah se chak nan a tawk zo lo. Inkhel inhnehtawk takah Milwaukee Bucks chu Phoenix Suns lakah 125-124 in an tlawm.
Suns tan hian Devin Booker chuan second 32.6 chauh awm tawhin free throw aṭangin basket pawimawh a nei a, point 30 a hlawhchhuah tlinna chiah ni bawkin a team a chakpui ta zawk a ni.
Antetokounmpo-a'n season kal laiah match khata a point neih hnem ber ṭum a tawng a, mahse thlawptu a neih ṭhat lo bakah Suns lam an khel ṭha rual. Booker bakah Chris Paul chuan point 28 neiin hnehna an chan theih nan an pawimawh hle.
NBA champion lai Los Angeles Lakers chuan over time an khelhpui hnuah Oklahoma City Thunder chu 114-113 in an hneh ve bawk a, an elpui team laka hnehna chang turin Lakers hian vanneihna an mamawh tel.
LeBron James-a'n point 25, assist vawi sarih leh rebounds vawi ruk a la, season hmasa lama champion puitu American star hian tun hnaiah a team hi match ruk chhung chu a zawnin hnehna a chanpui leh tawh.
Kevin Durant khel thei lo mah se Brooklyn Nets-in James Harden leh Kyrie Irving an la nei tho, an player ṭha pahnihte theihna hmangin an khingpui Indiana Pacers chu 104-94 in an hneh ve bawk a ni.
NBA regular season kal laiah Nets hian vawi 15 hnehna chang tawhin Eastern Conference-ah pathumna an ni mek. Western Conference lamah chuan vawi 20 chak tawh Utah Jazz leh Lakers te an chungnung thung.
NBA Results
Phoenix Suns 125 - 124 Milwaukee Bucks
Chicago Bulls 129 - 116 New Orleans Pelicans
Los Angeles Lakers 114 - 113 Oklahoma City Thunder (OT)
Dallas Mavericks 118 - 117 Atlanta Hawks
Toronto Raptors 137 - 115 Washington Wizards
Brooklyn Nets 104 - 94 Indiana Pacers
Los Angeles Clippers 119 - 112 Minnesota Timberwolves
Denver Nuggets 133 - 95 Cleveland Cavaliers
Memphis Grizzlies 130 - 114 Charlotte Hornets