Barca mualphona thlentu an duh loh Rakitic

Copa del Rey semifinal first leg-ah Sevilla chuan 2-0 in Barcelona an hneh a, Jules Kounde leh Barca duh loh hnu Ivan Rakitic-ten goal khat ve ve an khung. 

March 3 zanah semifinal second leg khelh a ni dawn a, Barcelona tan Spanish Cup final lut turin Nou Camp-ah goal thum aia tlem loa chak a ṭul dawn. 

Barcelona-in season an la hmang fuh rih hleithei lo. Spanish Super Cup final-a Athletic Bilbao an ngam loh hnuin inelna hrang hrangah match ruk ngawt a zawnin an chak leh tawh a, tunah Sevilla-in an chak tluang lai an titawp leh ta. 

Copa del Rey semifinal inkhel dangah nizan dar 1:30 khan Athletic Bilbao leh Levante an inhmachhawn a, he thu buatsaih a nih lai hian result kan hre hman lo. 

Sevilla khelmualah team pahnihin chak an tum ve ve ngam a, an innawr tawn zak zak - minute 25-naah Sevilla lam hian an hlawh chhuak ta nge nge a, Jules Kounde chuan goal hmahruai a rawn khung. 

Kum 22 mi centre back hian striker class sang tih awma mawiin Barca player pali ngawt a bum zet a, Barca chhuanvawr Marc-Andre ter Stegen goal venah inringtawk takin a pet goal zui. 

Sevilla goal hmasa hi minute 25-na chauha lut a nih avangin Barca tan beisei tur a la awm a, Spanish club hian si phurh sut ngei tumin theihtawpin an nawr - mahse, a pawimawh ber goal an hlawh chhuak thei lo. 

Team pahnih an intiat tawk a, Seville-in goal khata lungawi tum mai loin goal dang khung belh an tum ngam ve bawk. Inkhelh chhung zawngin vawi 11 ngawt shot an nei a, vawi thum goal zawnah a kal - Barca-in vawi 13 shot neiin vawi li goal zawnah a kal thung a, team pahnih inan lohna chu Seville-in goal an zawng hmu bik kha a ni. 

Koeman-a'n Barca-a enkawl dawna a player duh loh zingah Rakitic a tel a, Sevilla hnenah euro maktaduai khat chuang awrhin an kaltir - an duh lo takzet tih a lang. 

Mahse, Rakitic-a'n amah ang thoa Barca-in duh loa an chhuahtir Luis Suarez angin Ronald Koeman-a'n thutlukna a siamsual tih a lantir chhunzawm zel a, minute 85-naah chak nemnghehna goal-a khung. 

Sevilla tana captain armband hrengtu hian a intiam ang ngeiin a goal khung erawh a lawm duh lo a, season ruk zet a lo khelh tawhna Barca lakah zahna a lantir. 

Kum 32 mi midfielder hian tun season inelna hrang hrangah match 30 khelin goal nga a khung a, assist vawi thum a nei tawh. Statistic piahlamah Rakitic hian La Liga top four an beiseina kawngah pawh a thawhhlawk hle. 

Barcelona inkhel result a awm chuan khawvelin Lionel Messi lam a hawi ṭhin a, Argentine forward hian Sevilla lakah inkhel bul ṭan mah se goal a keng tel bik lo.

Messi hian goal khungna chance pawh a nei a, mahse, a beisei angin goal erawh a khung thei lo - hun tawp lama a freekick pet ṭha tak pawh Sevilla goalkeeper Yassine Bounou chuan ṭha zetin a dansak. 

Barca boss Ronald Koeman chuan, "Hei aia result ṭha zawk hi kan phuin ka hria. Kan khel ṭha a, chance pawh kan insiam. Zanin kan result hian khelmuala thil thleng kha a hrilhfiah tawk lo a, Sevilla an vannei hle," a ti!

Dutch coach chuan, "VAR a awm a, penalty hlawh turah ka inngai a ni," a ti bawk. Barca hian Suso-a'n Jordi Alba a tih tluk vangin penalty an hmuah an ngai a, mahse referee Mateu Lahoz-a'n video assistant referee-a rawn hnuah pawh thutlukna a sut lo. 

Covid-19 vangin Copa del Rey hian season hmasa champion an la nei rih lo - champion lai pawh awm loin semifinal an khel der tawh tihna a ni a, a dangdai hle. 

Copa del Rey 2019-20 final hi April 18-a khelh tura ruahmanna siam hmasak zet a ni a, mahse, Covid-19 hri a len avangin ruahmanna hmasa angin khelh theih a ni ta lo. 

Tunah hian Seville khawpuia La Cartuja Olympic stadium-ah final khelh tura ruahmanna kalpui mek a ni a, kumina semifinal lut leh ngat Athletic Bilbao leh Real Sociedad-ten champion tur an zawng ang. 

A tawi zawnga sawi chuan season hmasa champion kan hriat hnu lawkah champion thar an awm dawn tihna a ni a, Covid-19 vangin football kalphung a danglam nasa hle.