Barcelona tan Coutinho-a inlan tawh dawn lo?

Ronald Koeman-a hnuaia insiamṭhat a tum lai mekin Barcelona midfielder Philippe Coutinho a inhliam a, Brazil international hi a khup hliam vangin kuminah a inkhel lai kan hmu thei rih lo. 

Liverpool midfielder hlui hian mimal angin training zawm leh tawh mah se inkhel tur chuan March vel thleng a nghah a ngai dawn niin khawthlang media-te chuan an tarlang a, titi thar berah chuan Barcelona hian tun season-ah dam pawh ni se chhawr an tum tawh lo!

Sum vanga talbuai mek Barca hian January 2018 khan pound maktaduai 142 vel thlenga sang chho thei turin Coutinho hi Liverpool aṭangin an lei a, a tirah pound maktaduai 105 pe nghalin, a bak hi a khelh ṭhat dan a zira instalment-a pek tur a ni. 

Spanish journalist Javi Miguel chuan Coutinho hian tun season-ah match sarih a khelh leh chuan Barca hian pound maktaduai 4.5 chu Reds hnenah an pek leh a ngai dawn niin a sawi a, heti zat chawi belh ai chuan Barca hian khelhtir tawh rih loh an tum niin a sawi!

December 29 zana Eibar nen 1-1 a an inhnehtawk ṭumin Coutinho hi a inhliam a, a khupa hliam a tawrh hma hian inelna hrang hrangah match 14 khelin goal thum a khung hman a, assist vawi hnih a nei.