Juve hmachhawn tur Atalanta

Coppa Italia final khel tur a chiang ta. Champion lai Napoli hnehtu Atalanta leh season hmasa finalist Juventus ten nomawi an inchuh dawn. May 19, Nilainiah champion zawnna hi neih a ni ang.

Semifinal fist leg-ah Napoli leh Atalanta te goal awm loin an inhnehtawk. Nilaini zan khan second leg khelh niin Duvan Zapata-a'n goal hmahruai a khung bakah Matteo Pessina tan vawi hnih siamsak bawkin final a hruai thleng a ni.

Atalanta hian 1963 khan Coppa Italia hi an lo chawi tawh, a hnu lamah nomawi chawi an la nei leh lo - an club title lak awmchhun a ni hial. 2019 khan cup inelnaah hian final lut mah se Lazio an ngam lo, kuminah hun ṭha an nei leh dawn chiah.

Gian Piero Gasperini kaihhruaina hnuaiah nasa takin hma an sawn, a bik takin attacking football hmuhnawm tak an khelh ṭhin chuan fak a hlawh. Tun hnai Serie A season hnuhnung pahnihah team goal khung hnem ber an ni hial - Champions League last 16 an thleng bawk.

Atalanta coach Gasperini chuan, "Ka naute khelh dan khan min tilawm hle, nitin hmasawnna pakhat tal neih belh zel kan tum a, final thlen hi hmasawnna rahchhuah chu a ni. Tunah chuan chak kan lawm ang, final chu nakinah kan thlir lawk ang.

"Match hautak khelh hmabak kan ngah, chung zingah chuan Real Madrid nen UCL kan khelh tur pawh a tel, Spanish champion lakah ka nauten an theihna zawng zawng an hlan leh ka beisei," tiin UCL lamah pawh thui zawk thlen ngei a duh. 

Serie A table-ah pasarihna an ni mek bawk a, khelh zat inangah palina AS Roma an phak lohna chu point thum chauh a ni. League match khelh hmabak an la ngah avangin a sang pali zinga tel phak pawh an la beisei ngam ang.