ICC Test Ranking Root-a'n hma a sawn, Kohli a tlahniam

ICC Test Ranking thar berah England captain Joe Root chu batting ranking-ah pathumnaah an invawrh chho a, India captain Virat Kohli erawh panganaah an tla thla thung.

Root hian Test match hnuhnung pathumah century a siam vek a, Sri Lanka nen an inkhelh ṭumin 228 leh 186 a siam a, India nen first Test-ah run 218 zet a siam leh bawk. Kum 30 mi Root hian England chu heng match pathumah hian hnehna an chanpui vek bawk.

Hetihlai lai hian Virat Kohli erawh beisei angin a che ṭha tawk lo. Australia nen Test match an khelh ṭumin run 74 leh 4 a siam a, mualpho takin India an chak lo. Kohli awm loh hnu hian

India-in Aussies hi an lehthal a, 2-1 in series an la. England nen an inkhelh ṭumin Kohli a rawn let a, run 11 leh 72 siam mah se Test match hmasa berah an chak lo a, batting ranking-a a tla thla hi a mak lo.

England international hlui Monty Panesar chuan, "India hian series an la thei lo a nih chuan Kohli hian captain hna hi a chelh chhunzawm ka ring lo," tiin a sawi. Kohli captain-na hnuaiah India hi vawi li an chak tawh lo a, England leh Australia an hneh loh hma hian New Zealand lakah vawi hnih an tlawm.

February 13-17 chhung hian Chennai-ah India leh England hian Test match vawi li khelh tura a vawi hnihna an khel dawn a, Kohli hote hian Root-a hote hi hneh ngei an tum ang.