Bayern leh Upamecano an inhnaih?

Bayern Munich chuan nipui bazarah RB Leipzig defender Dayot Upamecano lakluh ngei an tum. France international defender hian kum 2023 thleng Leipzig-ah contract a nei a, release clause hi euro maktaduai 42.5  (£38m/$52m) nia sawi a ni.

Bavarians hian Upacmecano hi a release clause anga lak an ngam a, chutihrualin Chelsea leh Liverpool te pawhin Leipzig defender lak tum hian hma an la ve reng. Manchester United leh Upamecano ten inbiakna thui tak an nei tawh tihin sawi a awm a, hei erawh thuthang dik lo a ni thung. French defender khelh danin United hotute ti lawm mah se inbiakna mumal tak a awm lo.

Manchester United hi Real Madrid defender Sergio Ramos nen sawi zawm a ni a, chutihrualin tun thleng chuan indawrna an la nei lo. Spanish defender hi tun nipui hian a contract a tawp dawn a, free agent a nih chuan Paris Saint-Germain-in lak an duh. Tun dinhmunah chuan Ramos hi Real Madrid tan a khelh chhunzawm zel a rinawm ber zawk.