Liverpool lawmna siamtu Benitez

Rafael Benitez-a'n Premier League-ah Liverpool a champion pui thei lo a, Newcastle United a enkawl hnuah Reds champion theihna kawng a sial sak. Spanish manager enkawl Newcastle chuan Thawhlehni zan khan champion lai Manchester City 2-1 in an hneh.

St James Park-ah Sergio Aguero hmangin City-in minute khatna lekah khung mah se tlarhnung chetsual vangin second half-ah goal hnih an chhuah. Newcastle tan Salomon Rondon leh Matt Ritchie ten goal an khung a, point thum hlu tak an hlawh chhuak.

Pep Guardiola chuan bul ṭan turin keeper Ederson, Kyle Walker, Aymeric Laporte, John Stones, Danilo, Leroy Sane, Fernandinho, Raheem Sterling, David Silva, Kevin De Bruyne leh Sergio Aguero te a thlang.

Belgian midfielder KDB hi thlan zingah tun season-a khel tlem deuh ni mah se inhliam vang a ni a, chak tumin Spanish manager-in starting eleven a thlang tih a chiang.

Manchester City hian bul pawh an ṭan ṭha a, second 24-na lekah goal an khung. Raheem Sterling-a ball pet chu Newcastle player-in an dan per hnuah out turin lang hman mah se huaisen takin David Silva chuan keeper Martin Dubravka sut hlau loin a tauh let a, Aguero-a'n chiang zetin a khung.

Manchester City-in goal engzat nge an khung belh dawn tih chu zawhna a ni a, amaherawhchu referee Paul Tierney-a'n an khung belh tur ṭum khat a dang a, hemi hnu hian Magpies keeper Dubravka tan hna harsa an siam lo.

Minute 17-na lekah Kevin De Bruyne chuan fing takin mual sir aṭangin freekick a pet lut a, Aguero chuan goal hnihna tur ni turin 'class' takin a pet goal. City an lawm hmain referee Tierney chuan whistle a ham leh a, pet tura a tih hmaa pettu Belgian midfielder chu yellow card a pe thung.

Arsenal legend Martin Keown chuan, "De Bruyne tan chuan pawm thiam a har ang. Kei chuan rang taka petna chang hretu KDB ka fak a, a thiamna vangin an hremah ka ngai. Aguero finishing a ṭha em em bawk," tiin referee thutlukna a dem hle.

Newcastle-in second half an hmang ṭha zawk a, minute 66-naah Isaac Hayden tauh luh chu yard 12-na aṭangin Salomon Rondon chuan a volley lut. Magpies forward finishing a ṭha a, chutihrualin City tlarhnungin offside trap an siam dik lo a, ven ṭul ber an dah awl a, an fimkhur loh rah an seng.

City-in ṭum dang angin Newcastle tlarhnung tan buaina an siam thei lo a, hei vang hian mualneitu lamin chak beiseina an neih phah. Minute 78-naah City-in ṭul loah ball an pass tam mah mah a, box chhunga Fernandinho ball virpui chu Sean Longstaff chuan chhuhsakin Brazilian midfielder hian Newcastle midfielder hi a titlu. Referee-in penalty pein Matt Ritchie-a'n minute 80-naah chakna goal ni turin a khung a, he goal luh laia Pep Guardiola ner hmel chuan Man City dinhmun a ṭha lo tih a nemnghet.

Newcastle manager Rafa Benitez chuan, "Game plan kan nei a, minute khatna leka goal chhuah kha chu kan tum a ni lo. Halftime-ah game plan kan rin a ṭul thu kan sawi nawn a, player-te thawhrimna a fakawm a, team ṭha tak kan hneh a ni," tiin a sawi.

Liverpool ṭantute tan chuan result duhthusam a ni a, an manager hlui Rafael Benitez an fak. Spanish manager hian kum 2005 khan Instanbul-ah AC Milan chu ropui taka lehthalin Reds hi Champions League nomawi a chawi pui a, kum nga hnua Anfield a chhuahsan pawh khan mi tam tak tan chuan club legend a ni tawh hrim hrim.

Newcastle ṭantute hian an manager hlui hi an la hre reng a, City an hneh chiah hian Benitez fakna chungchang an ziak nasa. An thu ziak tam tak zingah 'League-a kan champion chuan Rafa Benitez hi Premier League champion medal pe ru' tih te chu mit la zual a ni a, a taka a thleng thei tur erawh a ni lo.

Manchester City manager Pep Guardiola chuan chak tura an khelh ṭhat tawk loh thu a sawi. Pep chuan, "Kan che rang tawk lo a, chak turin kan inpe tawk lo. Ball kan hloh nasa a, goal khung tumin kan nawr na tawk lo a, kan khkelh ṭha zan ber a ni lo," tiin a sawi.

Barcelona leh Bayern Munich manager hlui Pep chuan, "Ka player-te hi ka hmangaih a ni. Anmahni avang chauhin tuna England ka dinhmun hi ka thlen theih phah a, an zinga ka tel thei hi ka lawm hle. Newcastle kan hmachhawn hma hian match riat chhung a zawnin kan chak a, amaherawhchu kan duh ang vek hian thil hi a thleng thei lo. Newcastle hian goal-a an pet hmasa berah an khung a, an goal hnihna chu penalty a ni," tiin an vanduai thu a sawi.

Nizanah Liverpool leh Leicester City an inkhel a, Reds hian hnehna an chang a nih chuan Manchester City aiin point sarih an fal thei ang. Pep Guardiola hote hian Arsenal, Everton leh Chelsea te an hmachhawn chhunzawm dawn a, point hloh belh thei dinhmunah an ding.