RFL Plastics MFA Futsal League khuhhawn a ni ta

RFL Plastics MFA Futsal League Season 2 chu Deputy Government Chief Whip leh MFA hruaitu hlui Lalrintluanga Sailo-in Thawhleh zan khan Chanmari YMA Hall-ah a kick off a, khuallian Rintluanga chuan MFA zarah Mizoramin futsal khel ramte an elphak a beisei thu a sawi.

Futsal League Season 2 khuhhawnna hi Chanmari YMA Hall, Aizawl-ah neih a ni a, he hunah hian Nivia kut chhuak Mizoram football jersey phochhuah a ni bawk.

MFA Futsal committee assistant secretary Lalbiakdika Ngente chuan inelna hmachhawn tur team captain-te thu a tiamtir a, inelna hi vawiin aṭangin Electric Veng YMA Indoor Stadium-ah khelh ṭan a ni dawn a, March 8-a final khelh hman tura ruahman a ni.

Khuallian Lalrintluanga Sailo chuan, "Futsal League khelh theihna tura rim taka thawk tute ka fak a, ruihtheih thil laka fihlimna kawngah rah ṭha a chhuah ngei ka beisei. MFA zarah hian tun aṭanga rei loteah chuan Futsal khel ram ṭhate kan el phak ka beisei a ni," tiin rah ṭha a beisei thu a sawi.

MFA honorary secretary Lalnghinglova Hmar chuan sawi chhunzawmin "AIFF hnuaia Futsal League khelh ṭan tura state thlan bik tlemte zingah kan tel dawnin ka hria a, committee-in kan rel zawhah chiang zawkin a la puan theih ang. Mizoram futsal player-te tan hun ṭha a inherchhuak ngei dawn e," tiin a futsal player-te tan hmachhawp thar a awm thu a sawi.

Tetea Hmar hian Futsal League Futsal League khelh a nih theihna turin sponsorship neih a pawimawh tih a sawi a, MFA Futsal League khelh a nih theihna chhan RFL Plastics chungah lawmthu a sawi a. Inelna neihna hmun tur Electric Veng YMA Indoor Stadium hman theihna tura an dan thlenga siam danglamtu Electric Veng YMA chungah lawmthu a sawi bawk.

MFA Futsal Committee secretary Lalrinfela kaihhruaiin tie draw neih nghal a ni a; he league-ah hian MFA nena thawk dun Nivia ball siam hman a ni dawn a, ball-ah hian MFA logo a chuang a ni.

Zonet chuan round 6 aṭangin Futsal League hi live in a pechhuak ang.

Group A :    Laipui FC (Laipuitlang), FC Ramhlun Venglai, Lawmna FC (Dinthar), Bawngkawn FC, Ramhlun South FC, Armed Veng South FC, Chanmari Zothan Futsal, Saron Veng FC

Group B :    Durtlang FC, IDBI FC (Tuikual North), FC Leitan, FC Bungkawn, Whetstone FC (Ramthar), Zonuam FC, Chhinga Veng FC, Electric Veng FC

RFL Plastics MFA Futsal League Season 2 chu vawiin aṭangin Electric Veng YMA Indoor Stadium-ah khelh a ni dawn.

Vawiin hian team zawng zawng inlanin chhun dar 12 aṭangin khelh ṭan a ni ang a; Round 1 (vawiin) tih loh chu zan lamah zel khelh ṭhin a ni ang.

Nikum khan Futsal League hmasa berah Chanmari Futsal Club chuan Chhinga Veng Futsal Club hnehin champion hmasa ber an ni.

Tun ṭumah hian team 16 bawk an inel dawn a, group hnihah ṭhen niin vawi khat ṭheuh an inkhelh kual hnuah sang pali ve vein quarterfinal an lut ang.