UAE mualphotu Qatar-in final lut

Asian Cup khelh ṭantirhin champion tura beisei zingah Qatar hming a lang lo a, a hmawr bawk a hnai meuh erawh chuan hming lam rei ber an ni ta - Japan nen Asian champion nih an inchuh dawn!

Thawhlehni zan khan Qatar hian inelna thlengtu UAE chu 4-0 ngawtin semifinal-ah an sawp a, final an lut chiang hle. Qatar tan Boualem Khoukhi, Almoez Ali, Hassan Al Haydos leh Hamid Ismaeil ten goal khat ṭheuh an khung. 

Qatar-in Asian Cup final an la lut ngai lo a, mahse tunah chuan thawnthu thar ziakin an ram football chu bung thar an kaipui ta. UAE erawhin 1996 hnuah a vawi khat nan final khelh leh tum mah se an mualpho ta zawk. 

Qatar hian minute 22-naah he inkhela goal hmasa ber hi an khung a, Boualem Khoukhi chuan mual ding lam sir aṭangin a pet a, Qatar an tawn hma zawnga che ṭha UAE goalkeeper Khalid Eisa chu goal luh danah puh theih tak a ni. 

UAE-in goal an chhuah hnuah Ismail Al Hamadi leh Ali Mabkhout hmangin hun ṭha nei ve nghal mah se engmah lo maiah an chantir a, minute 38-naah an goal hnihna an chhuah zui. 

Kum 22 mi Almoez Ali chuan an goal hnihna hi a khung a, Iran legend Ali Daei goal khung record a nihrual nghal - tun inelnaah goal riat khung tawhin Asian Cup tournament khata goal khung hnem ber Ali Daei kiangah a hming a nem kai. 

Inelna thlengtu UAE-in mahni muala mualpho an duh lo a, second half-ah an si phurh sut zawh ngei tumin theihtawp an chhuah - Ahmed Khalil, Ismaeil Matar leh Mabkhout ten chance duhawm an rawn nei vek a, engmah lo maiah an chan vek. 

UAE goal nawr a nat avangin Qatar an bet thlap a, counter attack-ah erawh an hlauhawm thei hle. Minute 81-naah captain Hassan Al Haydos chuan Qatar goal thumna a khung ta nge nge a, injury time-ah Ismail chuan chhunzawm ve leh bawkin an chak chiang hle.

Qatar hian semifinal thleng hian goal chhuah an nei miah lo a, Asian Cup-a match ruka goal chhuah miah lo chunga final lut hmasa ber an ni. Qatar coach Felix Sanchez chuan, "Match ruk chhung goal kan chhuah tawh lo a, hei hi final kan thlen chhan lian tak a ni," tiin a tlarhnung a fak.

Qatar hi firfiaka chetna thlawpa puh an ni a, hemi vang hian Arab ram tam tak chuan an thawhhona pawh an titawp a, ram leh ram thawhhona titawp zingah UAE hi an langsar hle.

Hei vang tak hian semifinal-a an intawn hma pawh hian an boruak a sang tawh a, inkhelh hmaa Qatar hnam hla sak a nih laiin UAE fan-ten an au el nasa hle.

Inkhelh zawhah pawh buaina a chhuak zui a,  Almoez Ali-a'n an goal hnihna a khungin mipui zing aṭangin vawm a ni tawh a, an goal thumna leh lina luh thleng pawhin UAE mipui ten khelmual chhungah thil an vawm lut - UAE defender Mohamed Ismail Ahmed chu injury time-ah hnawhchhuah a ni.