Nun hluiah Manchester United an kir

Manchester United-in 1999 Champions League final-ah Bayern Munich chu injury time-a goal hnih hmangin an hneh a, chakna goal khungtu chu Ole Gunnar Solskjaer a ni. Thawhlehni zan khan United-in Old Trafford-ah Burnley an mikhual a, goal hniha an hnufual hnuah beidawng duh loin injury time-ah an si phurh an sut zo a, 2-2 in an inhnehtawk.

Clarets hian United midfielder Andreas Pereira tihsual hmang ṭangkaiin minute 51-naah Ashley Barnes hmangin hma an hruai a, Chris Wood-a'n minute 81-naah a tauh goal ber bawk. Solskjaer hnuaia United chak tluang a tawp dawn tih a lang tawh a, an chak lohna hmasa ber an tawng dawn niin a lang.

Amaherawhchu United an beidawng lo a, an vannei tel bawk. Jesse Lingard chuan Jeff Hendrick lakah penalty a hlawh chhuak a, minute 87-naah Paul Pogba-a'n goal-ah a chantir. Injury time minute hnihnaah Alexis Sanchez ball tauh chu Burnley keeper Tom Heaton-a'n dang mah se a per chu Victor Lindelof-a'n goal-ah a chantir ta tho.

Point thum hmuh inbeisei United tan result ṭha a ni lo a, chutihrualin goal luh dan aṭanga thlir Burnley zawk hian point hnih an hlohah an ngai ang. Burnley manager Sean Dyche chuan, "Engvangin nge injury time-ah minute nga an pek ka hrethiam lo a, kha khan mipui a ti phur nasa a ni. Lindelof pawh kha Sanchez-a'n ball a tauh khan a offside a, chiang tak chu ni lo mah se a offside na a tam lo ang," tiin an vanduai thu a sawi.

United manager Solsjkaer chuan, "Ball kan chang tam a, chance kan insiam tam a, chak lo tur kan ni lo. Chutihrualin kan khel ṭha tawk lo a, mipui pawh kan tihnual a ni. Amaherawhchu a tawp thlenga awm te chuan a tawp thlenga Old Trafford a awm te chuan tun hma boruak ang kha kan tem tir leh a ni a, point khatah lawm lo mah ila kan hlawhchhuah dan erawh team tan a ṭha hle," tiin a sawi.

Norwegian manager hian player a thlang fuh tawk lo a, Romelu Lukaku chuan tlarhmaah beisei a pha lo a, mual sirah Marcus Rashford a hlauhawm tawk lo, forward che rang pahnih thlawptu Juan Mata chuan an goal nawrna tur a pawt muang niin a lang a. Substitute Alexis Sanchez leh Jesse Lingard te luh hnuah United goal nawr a na leh thung.

United hi paruknaah an awm chhunzawm zel a, February 3 hian King Power Stadium-ah Leicester City an hmachhawn ang.