Spanish Cup semifinal beiseitu Real

Copa del Rey quarterfinal second leg-ah Real Madrid chu zanin hian an inlan dawn a, dar 2:00-ah Girona chu khualmualah an lenchilh ang.

Real hian first leg-ah Girona hi 4-2 in an lo hneh tawh a, tlang lo tur chuan Girona hian 2-0 a an hneh a ngai dawn tihna a ni - Real an tlang ngei a rinawm. 

Thawhlehni zan khan Copa del Rey quarterfinal second leg match hmasa ber khelh a ni a, Valencia chuan 3-1 a Getafe hnehin semifinal lut hmasa ber an ni. 

Nizan khan Barcelona-in Sevilla an hmachhawn a, Real Betis leh Espanyol inkhel bawkin he thu buatsaih a nih lai hian result kan hre hman lo. 

Santiago Bernabeu-ah quarter-final first leg khelh a ni a, Real Madrid hian 4-2 in hnehna an chang. Sergio Ramos chuan goal hnih khungin Lucas Vazquez leh Karim Benzema te chuan goal khat ve ve an khung bawk. 

He result hi Real fan-te tan hahdamna thlentu a nih theih rualin Girona fan-te tan beiseina siamtu a ni ve tho - away-ah goal hnih an nei sa a, semifinal lut tura an mamawh chu goal hnih khung belh a, goal chhuah loh a ni mai!

Girona leh Real player enin mualneitu team tan Real laka goal hnih khung hi thil harsa tur angin a lang mai thei. Mahse, Girona hian Santiago Bernabeu-ah goal hnih an khung thei a, mahni muala goal hnih khung hi an zuam sawt ang. 

Hriat tel atana ṭha chu Girona hian Cristhian Stuani an nei - kum 32 mi striker hian tun season-ah goal 13 a khung tawh a, season hmasaa goal 21 khungtu striker hian Real a hlau lo ang. 

Real Madrid fan-te tana thu hriat nuam tak tur chu Gareth Bale a dam tawh tih hi a ni. Real hian Girona an hneh hmasak zawk hnuah khan league match-ah 4-2 vekin hnehna an chang a, khualmualah Espanyol an hneh. 

Espanyol khelmuala inkhelah hian hliam vanga a chawlh reng hnuah Gareth Bale chu bench aṭanga luhtir niin goal a khung nghal a, Welsh forward hian a dam tawh tih a nem nghet - zaninah a inlan a rinawm. 

Real tan captain Sergio Ramos chu hliam vangin a inlan theih a beiseiawm loh a, mahse Raphael Varane leh Dani Carvajal an awm avangin Madrid khaw club tan phan viauna tur awmin a lang lo. 

Real ṭantute tana thu hriat nuam tak ni tel tur chu Girona hi tun hnaiah an khel chau hle. Atletico Madrid an inhnehtawkpui hnuah Real Betis chu 2-3 in an ngam lo a, Real leh Barcelona a zawna an hmachhawn leh hnuah Real an tawng leh dawn - a hautak ang.

Copa del Rey quarterfinal first leg-ah 0-1 in Valencia an tlawm a, an mikhualna ramah an mualpho - mahse Valencia hi second leg-ah an insiamṭha a, Getafe chu 3-1 a hnehin inkhel pahnih belhkhawmah 3-2 in an chak a, semifinal an lut. 

Valencia tan Rodrigo chu 'hero' a ni a, kum 27 mi Spanish striker hian hattrick a siam a, goal hnih hi injury time-a a khung a la ni zui! Rodrigo chuan, "Hei hi kan nihna chu a ni a, a tawp thlengin kan beidawng ve ngai lo," a ti. 

Getafe hian minute khatna lekah Jorge Molina hmangin hmahruaina goal an khung a, a hmaa 1-0 a an lo chak tawh bawk avangin an tlang ngei dawn niin a lang. Mahse, Rodrigo hian minute 61-naah an si phurh sutin injury time-ah goal hnih a khung bawk.

Valencia hian minute 74-naa Getafe defender Djene Dakonam hnawhchhuah a ni chu an chhawr tih a lang a, Valencia defender Mouctar Diakhaby leh Getafe player Bruno González chu injury time-ah hnawhchhuah an ni bawk a, inkhel boruak sang takah hian buaina a chhuak zui.