Real Kashmir hun a thleng

Hmahruaitu Chennai City laka 1-0 a hnehna an chan hnu lawkah Real Kashmir-in fiahna hautak an hmachhawn lehnghal dawn a, khualmualah nomawi chawi tura an elpui Churchill Brothers chu vawiin tlai dar 5:00 hian an lenchilh ang. 

Churchill Brothers leh Real Kashmir hian league match 14 an khelh tawhah point 28 ve ve an nei a, hmahruaitu Chennai City chu point hnih chiahin an phak lo - zanina chak lo zawk tan nomawi chawi an tumna kawngah a pawi thui thei dawn. 

Mahni muala khel tur Churchill hian East Bengal striker hlui Willis Plaza an kawl a, Trinidad and Tobago international hlui hian tun season-ah league goal 15 a khung tawh - Real Kashmir tlarhnung tan ven bik a fin thlak ang.