Real Betis-ah Jese a kal

Jese Rodriguez chuan Paris Saint-Germain aṭangin Real Betis a zawm a, Spanish La Liga club tan hian tun season tawp thleng loan hmangin a khel dawn a ni.

Kum 25 mi Jese hian tun season chhungin PSG-ah hmun a chang meuh lo, Strasbourg nen French Cup an khelh ṭumin an chak dawn tih a chian hnuah hun tawp hma chiahin bench aṭanga luhtir a ni a, tun season-a a inlan awmchhun a ni.

Season hmasa khan Spanish player hi Stoke City tan loan hmang bawkin a khel tawh, khatih laia Premier League club tan khan match 13 aṭangin goal khat a khung.

Real Madrid player hlui Jese chuan, "Ka nihna tak pholang turin hun ṭha ka nei tur hi ka lawm," a ti. Thomas Tuchel-a'n chhawr duh lo mah se a ṭhatna a la tlakhniam loh thu a sawi tel bawk.

French champion hian Jese chhuah mah se Argentina midfielder Leandro Paredes chu Zenit St Petersburg aṭangin an lalut a, kum li leh a chanve daih contract an ziahpui.