Milan tân Piatek bul ṭan fuh

Krzysztof Piatek chuan a club thar AC Milan tana inkhel bul a ṭanna hmasa berah goal hnih khungin Napoli 2-0 in an hneh a, Italian club hlun hian tun hnai season li chhunga a vawi thum nan Coppa Italia semifinal an inhlangkai leh ta.

Poland international hian kar hmasa mai khan Genoa aṭangin Milan hi a zawm, Napoli lakah minute 10-na lekah goal hmahruai a khung bakah chawlhlawk hmain goal hnihna a khung belh bawk.

Kum 23 mi Piatek hi Gonzalo Higuain a chhuah avanga chawpchilh taka lakluh a ni a, a tan bul ṭanna duhawm a ni. Goal hmasa khung tur hian Lucas Paqueta hnen aṭanga a ball hmuh chu tawih zetin a la thla a, goal hnihna a luh dawn pawhin mualsir lam aṭangin huaisen takin Lazio tlarhnung a su hawng bawk - hun tawp dawna thlak a nih laiin fan-ten ding chungin zahna chibai an buk hial a ni.

Milan manager Gennaro Gattuso chuan, "Napoli kan hneh a nih chuan kan zavaiin kan khel ṭha tihna a ni. A bik takin Piatek khan fak a phu, a goal hnihna khung dan kha ball hlauhawm ni miah lo kha goal ṭha takah a chantir tih in hmu ang," tiin a striker thar a fak hle.

Nizan khan quarterfinal dangah Inter Milan leh Lazio an inkhel a, a chak zawk hian Gennaro Gattuso enkawl AC Milan an hmachhawn zui leh ang.