Cardiff lakah Arsenal vannei

Emirates Stadium-ah Cardiff City player bo Emiliano Sala sunna hun hman a nih hnuah inkhel boruak a dul a, mualneitu Arsenal lamin Pierre-Emerick Aubameyang leh Alexandre Lacazette te goal hmangin 2-1 in hnehna an chang hram.

Cardiff manager Neil Warnock chuan Gunners lakah point hmu lo mah se, "Tun season bika kan khelh ṭhat ber a ni," tiin a naute khelh danah a lawm thiam hle. Pound maktaduai 15 senga Nantes aṭanga an player manto ber tura an lakluh Sala chu thlawhtheihna pilot David Ibbotson nen an bo a, an rilru chiai leh khingbai tak a la reh hman lo a ni.

Team pahnih ten first half chhungin goal zawna pet an nei lo a, inkhel thununtu zawk Arsenal pawhin a hmawr an bawk thei bik lo. Second half minute 66-ah Bruno Ecuele Manga chuan Sead Kolasinac a tih tluk avangin penalty a chawi a, a pettu Aubameyang-a'n cool zetin a khung.

Striker Lacazette-a'n hun tawp hma deuhin chak taka ball a tlanpui hnuah an goal hnihna khungin, substitute Nathaniel Mendez-Laing chuan hun pek belhah keeper Bernd Leno dan hman lohin pet kual lut mawi mah se Cardiff tan point a hmuh pui zo lo.

Gunners-in match 24 aṭanga point 47 hmuin pangana an ni a, an chunga awm Chelsea nen an point a inzat; Champions League khelh beiseina a la bo vek lo. Mahse, Blues hian nizan khan Bournemouth an hmachhawn a, result a zirin an inkar a la danglam thei.

Club pahnih captain armband hrengtu Mesut Ozil leh Sol Bamba ten inkhel ṭan hmain Sala tan khelmual laiah pangpar an dah a, khemual chhunga Cardiff City fan-ten an player bo ta an hriat reng thu leh an sunna thuziak tam tak an tarlang.

Ngawi renga an din laiin Sala thlalak leh #PrayForSala tih lanna stadium chhungah lian taka tarlan a ni. Thu ziak tarlan zinga langsar tak pakhat chu “Once a bluebird, always a bluebird,” tih a ni bawk.

Inkhelh banah Warnock chuan an team boruak chungchang sawiin, "Kan thinlungah Sala a awmreng, boruak rit takin min delh vel chunga kan khelh danah khan ka lawm a ni. A bik takin Joe Bennett chungah ka lawm, ni thum liam ta mai khan a pa a thi, tunah erawh huaisen takin a khel chhuak thei der tawh," a ti. 

Arsenal manager Unai Emery chuan, "Inkhel boruak mak leh danglam tak chu a ni. Cardiff lam hun tawn mek kan hriatthiampui a, Emiliano Sala chhungte kan tawrhpui hle bawk," a ti.

Spanish manager chuan inkhel chungchang sawi zawmin, "A tir lam minute 10 chhung khan kan khel ṭhain kan nawr na hle, mahse Cardiff lamin nghet taka min lo do let pawh kha a mak chuang lo. Match zawng zawng a harsa vek tih kan hria, harsa taka point thum kan hmu thei kha a lawmawm.

"Mesut Ozil chungchang zawhna tun hnaiah ka dawng hnem, ani hi  kan captain pali - Laurent Koscielny, Petr Cech leh Aaron Ramsey te zinga pakhat a ni a, a pangana chu Granit Xhaka a ni. Captain zinga player ṭhenkhat hi an khel reng bik lo, chutiang nen chuan thil thuhmun a ni," tiin tun hnaia a chhawr tam loh Ozil chungchang a sawi bawk.