Arsenal-ah Denis Suarez a chiang?

Barcelona midfielder Denis Suarez chuan tun season tawp thleng cham turin Arsenal chu loan hmangin a zawm ngei dawn niin a lang ta, nipui bazar hunah an duh a nih chuan a nghetin an lei thei bawk ang.

Kum 25 mi Suarez hian 2013 khan Barcelona hi a zawm a, Catalan club tan hian match 71 khel tawhin - hmun nghet erawh a chang ngai lem lo. Unai Emery-a'n Sevilla a enkawl lai khan loan hmang thoin a lo hawh tawh, an thawkdun leh tur hi a mak hran lo.

Barcelona hian nizana Copa del Rey quarterfinal an khelh ṭumin Suarez hi squad-ah an telh lo, an telh loh chhan hi a hma hun tih chian nan hun a mamawh vang nia ngaih a ni. Nizan khan inremna an siam hman lo a nih pawhin Ningani hi chuan tihfel ngai an tifel hman tura ngaih a ni.

January thla tir aṭang khan Arsenal leh Suarez hi sawi zawm an ni. Mahse, Barcelona lamin nipui bazar huna a ngheta an hralh nghal thei dawn a nih loh chuan loan-in an chhuah ngawt duh bik lo.

Tuna thuthang thar berah chuan Spanish player hian 2020 June thla thleng Barca tana a contract neih chu a pawt sei dawn a, loan hmangin chhuak tho mah se a hlutna tlahniam tur hei hian a veng ang - a ngheta lei tur tan tlawm takin a lei theih dawn bik loh tihna a ni.