Marko Arnautovic a inhliam

West Ham-in an striker chhuanvawr Marko Arnautovic chungchanga chanchin lawmawm an neih hnu lawkah chanchin lawmawm loin a zui nghal a, Wolves laka 0-3 a an tlawmna inkhelah hliam vanga lakchhuah a ni. 

Kum 29 mi striker hi ball tauh tura a zuanna lamah a tla sual a, a ke phahah hliam a tuar. He thu buatsaih a nih lai hian Arnautovic hliam hi eng ang taka na nge a nih a la hriat loh a, Hammers boss Manuel Pellegrini chuan hliam na tak a nih loh hram a beisei thu a sawi. 

Arnautovic hi tun hnai khan Chinese club, an hming tarlan loh chuan lakluh tumin an dawr a, a man atan pound maktaduai 35 sen an inhuam bakah kar khata £200,000 hlawhtir an inhuam.

Austrian striker hian chhuah a duh thu pawh ual au takin a tilang hman a, mahse Inrinni khan rin loh takin London club-ah hian contract thar a ziak a, a contract rei zawng erawh puan zar a ni lo. 

West Ham hian Thawhlehni zan khan Premier League-ah Wolverhampton Wanderers chu an lenchilh a, mahse an mikhualna ramah hian 0-3 ngawtin an tlawm. 

Wolves tan Raul Jimenez chuan goal hnih khungin Romain Saiss chuan goal khat a khung a, Arnautovic a inhliam bawk avangin Hammers dinhmun a chhe hle - tun dinhmunah inkhel tlak player 15 chiah an nei!