Lakers player an fihlim
Los Angeles Lakers player ṭhenkhatin Covid-19 an kai tih hriat chhuah a nih aṭangin chawlh kar hnih a liam tawh a, tunah chuan Lakers player leh team pumpui chu hri leng lakah an fimhlim tawh tih tarlan a ni.
Lakers chuan thu chhuah siamin, "Lakers player zawng zawng chu coronavirus lakah an fihlim tawh. Team pumpui dam tawh mah ila sorkar thuneitu lam thurawn angin inenkawlna ṭha taka kalpui a la ni reng ang," an ti.
March 19, Ningani khan Lakers player pahnih chu Covid-19 an kai tih hmuh chhuah a ni a, an hming leh nihna erawh thupsak an ni.
Lakers hi Brooklyn Nets nen March 10 khan an inkhel a, Nets player zingah hri kai pali an awm avang an hnen aṭanga an kai chhawn a nih a rinawm.
Lakers player-te dinhmun hi enfiah ve nghal a ni a, hri kai lo awm ve bawk mah se an inkhung hran bakah enkawlna ṭha taka pek an ni bawk. Dam tawh mah se NBA an chawlh lailawk avangin engtikah nge an inkhelh leh ang tih erawh a la chiang lo.
Lakers guard Alex Caruso chuan, "Mi tam tak hian inven a pawimawhna leh fimkhur a ṭul zia kan la hre tawk lo, chiai si loa mahni awm hmuna kan fimkhur tlan a ngai a ni," tiin a sawi.