Liverpool-in an hun ṭha an bawhpelh

Premier League hmahruaitu Liverpool-in point sarih zeta Manchester City tlansanna remchang nei mah se an hun ṭha neih an chhawr thei lo a, an mikhual Leicester City nen 1-1 in an inhnehtawk. 

Liverpool tan Sadio Mane chuan minute thumna lekah goal hmahruai a khung avangin awlsam takin an chak dawn niin a lang hman a, mahse Harry Maguire-a'n first half hun pek belhah an si phurh rawn sutin goal dang a lut tawh lo. 

Reds-in hnehna chang zo lo mah se table chung berah awmin point ngain an la sang fal tho a, mahse City nena inum an nih avangin Nilaini zana point hnih an 'hloh' hi nakinah a la pawi thui thei. 

Liverpool manager Jurgen Klopp erawhin, "Kan khelh hma aiin point kan ngah zawk a, kan duh ang takin engkim kal lo mah se chi aina hun a la ni lo," tiin an dinhmun ṭhat thu a sawi.

Liverpool khawpui a vawt a, vur a tlak nasat avangin Anfield khelmual chhungah vur a tam a, team pahnih inkhelh dan aṭangin duh ang takin ball an pet thei lo tih a hriat. 

Reds hian second 121-na lekah April 2016 hnua Premier League-a an goal rang ber khung mah se beisei ang an ni zui lo a, Mohamed Salah chu minute 90 chhung hmuh tur a awm mang lo!

Vur tam vangin Liverpool hian an game rang tak leh hmuhnawm ang kha an pholang thei lo tih a hriat a, Salah leh Mane ten an tlan chakna an chhawr tak tak thei lo a, Roberto Firmino ball thiamna hmuh tur a awm lo bawk. 

Klopp chuan, "Ball kha a lir ṭha duh lo em em a, kha khan kan khelh dan a tibuai vek a ni," tiin a sawi. 

Hnehna an chang zo lo miau a, Reds fan-ten lungawi lohna tur an zawng a nih pawhin 'phunna' tur an nei tlat - penalty ni ngei tura ngaih hnawl sak an ni a, Maguire chu red card pek a ni lo bawk. 

England international Maguire hian an si phurh sutna goal a khung hma hian mahni chauha tlan fal tawh Mane a ti tlu a, Reds player ten red card an beisei laiin referee-in penalty pekna turah a ngai lo. 

Hetihlai hian Naby Keita chuan goal a khung ngei dawn nia a lan hnuah Ricardo Pereira chuan a hnung lam aṭangin a ti tlu a, Anfield-a fans pungkhawm ten penalty hmuh inbeisei mah se pek an ni lo. 

Klopp chuan, "Mi zawng zawngin penalty hmuh kan phu tih an hmu ang a, penalty pek kan nih loh chhan hi keichuan ka hrethiam lo a ni," tiin a lungawi lo hle. 

Liverpool hian referee thutlukna tam tak thlirin lungawi lohna tur nei mah se point insem hi result 'fair' tak niin a lang a, Reds hian an khelh dan aṭangin point khat aia tam hmuh an phu lo. 

Merseyside club tan inkhelh hmaa dinhmun chiang lo Virgil van Dijk a inlan thei a, hetihlai hian Trent Alexander-Arnold a inhliam avangin right back-ah captain Jordan Henderson chhawr a ni.

Manchester City hneha Liverpool tana beiseina siamsaktu an manager hlui Rafael Benitez hming lamin Liverpool fan-te an zai rual a, mahse an coach hluiin Newcastle United kaltlanga hna ṭha tak a thawhsak zanah beisei an phak tlat lo. 

Foxes manager Claude Puel chuan, "Second half ṭantirah khan kan chhaih buai hle a, goal khung thei hial kan ni," tiin chak an phu thu a sawi.