Zaninah Asia ram champion inchuh

Asia khawmualpuia football thiam ber ram kan hre dawn ta - zanin dar 7:30 hian Japan leh Qatar ten Asian Cup final an khel ang. 

Football khawvela tawnhriat ngah aṭanga chhut tur a nih chuan Japan hi champion tura beisei chi an ni. Mahse, tun inelnaah Qatar hmasawn nasat zia hmuh turin a awm a, Japan hi champion chianga dah ngam chi an ni bik lo. 

Japan hi Asian Cup-a vawi li champion tawh an ni a, Qatar erawh an vawi khat final luhna a ni thung - an ram chanchina bung thar ziak turin an ṭang khawp ang.

World Cup 2022 thleng tur hian an football thiamna avang ringawt pawhin World Cup thleng tlak lo ang hiala sawi an ni a, mahse Asian Cup-ah anmahni sawiseltute chhangletin final hial an thleng ta. 

Qatar hian match rukah hnehna chang vek chungin final hi an lut a, goal 16 ngawt khungin an lamah goal a lut miah lo - Almoez Ali chu Qatar tan goal khung khawl niin goal riat a khung tawh a, Japan tlarhnung tan ven uluk a ṭul ang. 

Qatar chakna pakhat chu player leh coach an inhrechiang hi a ni. Barcelona academy boss hlui Felix Sanchez hian 2013 khan Under 19 aṭangin Qatar a enkawl ṭan a, tuna a player ṭangkai Almoez Ali, Akram Afif leh Tarek Salman te nen hian 2014 khan AFC U-19 Championship nomawi an lo chawi tawh. 

Japan-in an hming lem atana an pek 'Samurai Blue' hming an pu zo takzet a, an khingpuite tan tawh an khirhin tlarhma an hriam hle - goal 11 khungin goal thum chiah an la chhuah. 

Qatar-in Almoez Ali an neih an chhuang a nih chuan Japan-in Yuya Osako an nei ve tho - Werder Bremen forward hian hliam vangin match thum chauh la khel mah se goal li a khung tawh a, minute 53.5 dan zela goal khung ang a ni!

Japan hian tlarhnung lama ding turin Galatasaray left back Yuto Nagatomo leh Southampton defender Maya Yoshida te ho an kawl a, Qatar tlarhma lamah Almoez Ali te ho tan ṭum dang angin hna a awlsam dawn lo.