Vawiinah Aizawl FC leh Minerva

Aizawl FC chuan vawiin tlai dar 2:00 hian Tau Devi Lal Stadium-ah I League champion lai Minerva Punjab an hmachhawn dawn.

Mizo club hian Gift Raikhan hoin season bul an ṭan a, season liam ta I League best coach hian result ṭha a neih theih loh avangin banna a thehlut. Aizawl FC-in Standly Rosario an lalut a, ani hoa an khelh hmasak berah hmahruaitu Chennai City chu 4-3 in an hneh lo a, Neroca khelmualah erawh point khat an hlawh chhuak thung.

Aizawl FC hian Minerva Punjab hi RG Stadium-ah an hmachhawn tawh a, 2-1 in an hneh lo. Tun ṭumah hian an muala an hneh loh chu khualmualah hneh an tum dawn tihna a ni a, hmabak a awlsam lo ang. AFC tan champion a beiseiawm tawh lo a, relegate loh chu an tih theih sang ber a ni tawh. Table mawngphaha awm Shillong Lajong-in an match hnuhnung berah Minerva hi 1-0 a an hneh avangin Mizo club dinhmun hi a him lo a, an elpui Lajong tih theih hi an tih ve theih a ṭul ang.

Nilaini zana I League inkhelah Mohun Bagan leh Gokulam Kerala te 2-2 in an inhnehtawk a, Khalid Jamil-a enkawl Mariners tan champion a beiseiawm tawh loh. Kolkata club lian hian match 20 khelh turah match 15 khel tawhin point 22 an hmu a, hmahruaitu Chennai City point riatin an pha lo.