Barcelona-in an duh an thlentir!

Copa del Rey quarterfinal first leg-ah Barcelona chuan 0-2 in Sevilla ngam lo mah se second leg-ah erawh an duh ang takin thil an thlentir a, 6-1 ngawtin Sevilla hi an sawp!

Barca hian match hmasa zawka an tlawm avang hian si thum fai tala chak an mamawh a, an mamawh aia tamin an chak - inkhel pahnih belhkhawma an chakna hi 6-3 ngawt a ni. 

Catalan club tan Philippe Coutinho chuan goal hnih a khung a, an thiampuipa Lionel Messi leh Luis Suarez chuan goal khat ve ve an thawh bawk. 

Quarterfinal dangah Real Betis chuan 3-2 in Espanyol an hneh a, inkhel pahnih belhkhawmah 4-2 a hnehna changin semifinal an lut. 

1-0, Coutinho (Barcelona, 13 mins)

Quincy Promes-a'n a tih tluk avangin Messi-a'n penalty a hlawh chhuak a, tun hnaia dinhmun ṭha lo nia sawi Coutinho tan kianin a pet tir. 

Penalty hlah, Banega (Sevilla, 26 mins)

Sevilla-in penalty hlawh chhuak ve leh mah se Barca keeper Jasper Cillessen chuan Ever Banega pet a dan sak.

2-0, Rakitic (Barcelona, 31 mins)

Sevilla-in penalty an hlah aṭanga minute nga hnuah Barca tan Ivan Rakitic chuan an goal hnihna a khung. 

3-0, Coutinho (Barcelona, 53 mins)

Suarez ball siamsak chu Coutinho chuan a goal hnihna ni turin a khung. 

4-0, Sergi Roberto (Barcelona, 54 mins)

Roberto-a'n mamawh chhanna a ni tih pholangin an goal lina a khung a, Barca dinhmun a him.

4-1, Arana (Sevilla, 67 mins)

Penalty dangtu Cillessen-a'n ball kal dan chhut sualin Guilherme Arana tan goal khungna remchang a siamsak. 

5-1, Suarez (Barcelona, 89 mins)

Sevilla-in goal khat an khung leh chuan 4-4 a ni ang a, away goal rule hmangin an tlang thei dawn. Hei hi hriain Barca an attack a, mahse counter attack hmanga Barca hian vaw letin Suarez chuan an goal ngana a khung daih!

6-1, Messi (Barcelona, 93 mins)

Goal khung loa awm thiam lo Messi-a'n mawi taka ball an inpek kual hnuah an goal rukna a khung.