Sarri-a hote an sawp, Spurs fapa Son-a

Premier League club vantlang Bourne-mouth-in Champions League khelh tum Chelsea chu 4-0 zetin an sawp a, Tottenham Hotspur erawhin an fapa rangkachak Son Heung-min rawn let chu ṭhatpuiin Watford 2-1 in an lehthal.

Nilaini zanah Gonzalo Higuain chuan Blues kawr hain a vawi khat nan Premier League-ah a inlan a, amaherawhchu Vitality Stadium-ah Cherries tan Joshua King-a'n goal hnih a khung bakah David Brooks leh Charlie Daniels ten goal khat ve ve an khung bawk.

Wembley Stadium-ah Watford-in Craig Cathcart goal hmangin mipui ngawihtir mah se Son-a'n Asian Cup a khelh hnua league match hmasa berah siphurh sutna goal a khung a, Harry Kane aia lut Fernando Llorente chuan chakna goal a khung.

Chelsea-in ball an chang tam a, first half-ah ringawt pawh vawi 405 an chang chungin vawi nga chiah goal zawnah an pet thei a, Bournemouth tlarhnung an paltlang thei lo. An chance neih ṭhat ber erawh Mateo Kovacic chuan goal-ah ṭha takin tauh mah se kum 38 mi Artur Boruc chuan a khawih per hman a, crossbar a per hnuah goal-ah a lut lo.

Mipui mit fukna Argentine forward Higuain chuan keeper Boruc a tibuai lo a, vawi khatmah goal zawnah pet loin Eden Hazard erawh vawi 15 zet a pass a, goal khung ni loin Belgian forward thlawp chu a hna ber niin a lang. Amaherawhchu goal nawr kawngah a hlauhawm miau loh avangin Higuain hi darkar khat chuang hret hnuah lakchhuah a ni.

Bournemouth erawhin an club top scorer  Callum Wilson tel lo chungin goal khung kawngah harsatna an nei lo a, Manchester United academy chhuak King-a'n goal hnih a khung bakah vawi khat a siam a, player hmuhnawm Brooks-a'n minute 63-naah goal khungin injury time-ah Daniels-a'n a khung ve bawk.

Chelsea manager Maurizio Sarri chuan Cherries an hneh loh ṭum hian khelhna tam zawk duh vanga club chhuahsan duh Callum Hudson-Odoi chu squad-ah a dah lo a, Italian manager hian chhuanlam dang siam loin winger pali a neih avangin awl an awm a ṭul thu a sawi.

Sarri thusawi hi a dik a ni thei a, amaherawhchu English winger chhuah duh chhan chu a pawmawm ta hle. Inkhel chungchang sawiin Sarri chuan, "Khelmual chhungah khan ka hnathawh hmuh tur a awm lo a, kan khelh danah khan ka lungawi lo hle. Pressure ka nei lo a, ka hrilhai hle. Ka tihsual a ni thei a, ka player-te ka tiphur zo lo a ni," tiin media hmaah a player te a sawisel.

Cherries an hneh loh zawh hian Sarri hian dressing room pawnah coaching staff dang dahin darkar khat chhung player-te zilh nan a hmang a, a thawhpui dangte a ring tawk lo tiin a chet danin sawi zui a hlawh hle.

Tottenham-in League Cup semifinal-ah Chelsea an hneh lo a, FA Cup-ah Crystal Palace an hneh lo a, inhliam vangin an buai bawk a, hetiang buaina karah hian Watford laka goal an chhuah hmasak hnuah goal hnihin an chhang let.

Spurs-in Asian Cup-a South Korea tla hma an vanneih pui a, Son-a'n minute 80-naah siphurh sutna goal a khung a, minute sairh hnuah Llorente-a'n chakna goal a khung.

Mauricio Pochettino chuan, "Tunah chuan kan nui leh thei ta. Chak hi kan phu takzet a, kan rilru put hmang pawh a dik," tiin a sawi.