Pro Fight atan Mizo boxer 193

Zothan Autoworks LPS Pro Fight khel tur Mizo boxer ten nimin khan Hawla Indoor Stadium, Republic Vengthlangah inbukna an nei a, boxer 196 an kal. State pawn 

aṭangin boxer 20 chuang an tel dawn bawk.

Inelna hi nikum tawp lama neih tum ni mah se inthlanpui vangin a hun sawn a ni a, February 5 aṭang hian R. Dengṭhuama Indoor Stadium, Mualpuiah khelh ṭan a ni ang.

Lightfly leh bantam-ah boxer 62 ve ve telin weight zâng ber lightfly-ah tawnhriat nei ṭha 13 leh tawnhriat nei lo 49 an awm a, bantam-ah tawnhriat nei 11 an nih laiin tawn hriat nei lo 11 an ni ve thung.

Light-ah tawnhriat nei lo boxer 40 leh tawnhriat nei tha pasarih an vaiin 47 ziah luh an ni a. Middle-ah 19 an tel a, tawnhriat nei ṭha panga leh tawnhriat nei lo 14 an ni.

Ligthheavy-ah pathum chiah ziah luh an ni ve thung a, Jack Lalsangliana, Vanlalchhuanga leh MK Munga te bakah state dang aṭanga tel turten champion lai HC Johnkenty Vanhlimpuia title chhuhsak an tum dawn.

Kawnghren lak kir leh tumin champion tawh mi pathum - Abel Lalawmawia, ZD Lalchhuanawma leh HC Lalramfela an inbuk. Lightheavy-a vawi li champion tawh Serchhip boxer Abela'n middle-weight-ah a vawi khat nan a khel ang.

Tualchhung boxer bakah Manipur leh Assam-in weight hrang pangaah boxer pakhat ṭheuh an neih tur thu an sawi a, Meghalaya leh Tripura aṭangin boxer pathum ve ve an tel dawn bakah NorthEast state dang aṭang pawhin boxer beisei belh a ni bawk.