Arsenal player thar Suarez

Barcelona midfielder Denis Suarez chuan tun season tawp thleng cham turin Arsenal chu loan hmangin a zawm fel a, Premier League club hian a hlawh zawng zawng chu an pe pumhlum ang.

Kum 25 mi Suarez hian Catalan club tan 2021 June thla thleng daih contract a ziak thar a, mahse nipui bazar hunah Gunners hian an duh a nih chuan a nghetin an lei thei tho dawn a ni.

Unai Emery-a'n Sevilla a enkawl laia a chhawr tawh Suarez chungchang sawiin, "Khelmual sir lama chetla thei tur kan mamawh a, kan duh ang chu Suarez hi a ni," tiin a sawi. Spanish player hian tharum ngah tawk lo mah se a ball thiamna chu chhawr ṭangkai an tum ang.

Rawlthar a nih laia Manchester City tan pawha khel tawh Suarez hian Barcelona tan match 71 a khel hman a, mahse tun season chhungin Barca tan hian ṭum riat bak a la inlan lo - inkhelh tam theihna tur zawk a nih beiseiin English club hi a zawm.

Barcelona chuan thuchhuah siamin, "FC Barcelona leh Denis Suárez te chuan season khat dang contract thar kan ziak a, hetih rual hian loan hmanga a chhuahna tur pawh a fel nghal. A loan hun chhungin Arsenal-in a hlawh an pe vek dawn a, a ngheta lei theih a ni bawk ang," an ti.

La Liga club pahnih Sevilla leh Real Betis ten Suarez hi pound maktaduai 17-in a ngheta lakluh an duh, mahse EPL club zawm a thlang zawk.