Wolves-ah Castro Otto a nghet

Premier League club Wolves chuan Ateltico Madrid aṭanga loan hmanga an hawh lai defender Jonny Castro Otto chu pound maktaduai 15-in an la nghet a, kum 2023 thleng daih contract an ziahpui a ni.

Tun January bazar chhungin Wolves hian Otto chauh hi an la nghet a, Ruben Neves (£15.8m) leh Adama Traore (£18m) te hnung zuiin an club player manto pathumna a ni chiah bawk.

Kum 24 mi Otto hian Wolves tan inelna hrang hrangah match 22 a khel tawh, club tana a khelh ṭhat ṭhin avang hian nikum October khan a vawi khat nan Spain tan a inlan phak hial a, ram tan hian match hnih dang a khelh belh leh tawh bawk a ni.

Celta Vigo tan pawha khel tawh Otto chuan, "He club tana hun rei zawk ka khel thei tur hi ka lawm, he hmunah hian hmasawnna a awm a, min ring ngamtu club tan hian ka theihtawp chhuah chhunzawm ka tum," tiin a sawi.