Schalke-in City rawlthar lalut

Nantes chuan Emiliano Sala chuanna thlawhtheihna bo hnua an match hmasa ber chu Nilaini zan khan an khelmual Stade de la Beaujoire-ah an khel a, Argentine forward thlahna hun neiin 'an ṭhianpa leh unaupa' ngaiin an rum.

Stadium-ah chuan mipui an tlim hmur a, big screen-ah chuan Sala hlimthla pholan pahin rimawi lunglen thlak tak chu a ri tel a. Nantes ṭantu naupang leh upa te rilru hmun khatin an awm a, 'an thinlungah Sala-a'n hmun pawimawh a chang' tih a lang chiang hle.

Putar pakhatin 'Sala, kan lawm e' tih chuanna poster mittui tla chunga a pholang te chuan thu tam a sawi. Dressing room lamah pawh Sala hian Cardiff City a zawm tawh chungin a ṭhutna zawnah chuan ṭum dang ang thoin a jersey number 9 leh Emiliano Sala tih chu a la chuang kalh.

Amaherawhchu Sala hming chuanna jersey number 9 erawh a awm lo a, Sala thlalak chuanna T. Shirt var erawh an khai thung. He T Shirt var hi warm up-naah player zawng zawngin an ha vek a, a hnungah chuan n 'On T'aime Emi'  tih a chuang a, chumi awmzia chu 'Emi, kan hmangaih che' tihna a ni. An khingpui Saint-Etienne player te pawhin 'pray for Sala' tih chuanna T Shirt chu an ha ve bawk.

Sala chuanna jersey hrim hrim erawh ṭum dang zawng aiin a tam a, Nantes player zawng zawngin Sala hming chuanna vek an ha a, hetah hian la duh tawk lo. Player hian armband hring an hreng vek a, 'beiseina' tih a lantir a, jersey number hnuaiah chuan 'Animo Emi' tih a chuang a, 'Huaisen takin Emi' tihna a ni a, beisei insiam chawpin an ṭhianpa an fuih.

Field laiah chuan Emiliano Sala thlalak chu an pawt bial kalh a, stadium tluanin tifo (mipui siam chawp banner lian) hmuh tur a awm a, 'SALA' tih inziak chu a lian fal nalh a, Argentina flag leh Sala thalak te hmuh tur a awm bawk.

Referee chuan minute 9-na a nih chiah chuan jersey number 9 ha ṭhin Sala hriat reng nan inkhel a ham tawp a, minute khat chung Argentine forward hriat rengna hun an hmang. Nantes manager Vahid Halilhodzic pawh insum zo loin a mittui a tla.

Nantes leh St Etienne inkhel hi 1-1 in an tawp a, player pakhat ve ve hnawhchhuah a ni bawk a, inkhel nung tak ni mah se an sawi zui erawh Emiliano Sala a ni.