Juventus ngam loh Duvan Zapata

Coppa Italia champion lai Juventus chu quarterfinal aṭanga vuak tlak an ni. Nilaini zan khan Juventus hi Atalanta lakah 3-0 in an tlawm a, Cristiano Ronaldo leh Paulo Dybala te aiin goal hning khungtu Duvan Zapata a langsar hle.

Atleti Azzurri d'Italia-a inkhelah Juventus defender Giorgio Chiellini chu hliam vangin minute 27-na lekah lakchhuah a ngai a, amah thlaktu Joao Cancelo chetsual vangin Timothy Castagne-a'n an goal khatna a khung phah.

Goal hmahruai luh aṭanga minute hnih hnu lekah Juventus an chesual nawn, Colombian striker Zapata chuan box chhungah huai taka ball a vir pui hnuin goalkeeper Wojciech Szczesny dan hman lohin a khung.

Serie A hmahruaitu Juventus lamin second half-ah hun ṭha nei mah se, hnai tak aṭanga midfielder Sami Khedira hlap chu keeper Etrit Berisha-a'n ṭha takin a dan sak - goal an phurh hnuah Juve manager Massimiliano Allegri chu a chet dan mawi lo vangin hnawh chhuah a ni a, an buaina a zual sauh.

Hun tawp hma deuhin Juventus bawk an chesual, defender Mattia de Sciglio-a back pass fuh tawk lo nangchingtu Zapata chuan tun hnai a match hnuhnung 10 aṭanga a goal 17-na khung nan a hmang.

Italian manager Allegri-a'n a enkawl chinah Juventus hian Coppa Italia hi a zawnin vawi li an chawi tawh a, kuminah erawh beisei ang an thleng phak lo. Hnehna changtu Atalanta hian semifinal-ah chuan Fiorentina an hmachhawn dawn a ni. Inkhel dangah Fiorentina chuan Roma 7-1 a sawpin an tlang bawk.

Kum 51 mi Allegri chuan, "Kan tan chuan zan duhawm lo tak a ni, season hmasa khan Napoli nen league match kan khelh ṭumin hun ṭha vawi tam tak insiam chungin goal khung kan harsat tlat tawh, khatiang ṭum ang kha kan tawng leh.

"Ka nauten an theihna zawng zawng senga an khelh avangin ka dem thei lo, inelna kan ngaih pawimawh a nih avangin a ṭha thei ang berin kan thawk chhuak. Kan khingpui khan tharum an ngah bakah an huaisen zawk niin a lang a, hnehna chan kha an phu a ni," tiin a sawi.