Sala chuanna thlawhtheihna hnu hma hmu

Emiliano Sala chuanna thlawtheihna ṭhutna pahnih chu France khaw hmar thlang lam Normandy huam chhunga mi Surtainville vau kamah hmuh a ni a, helai hun hi an biak theih hnuhnunna ber aṭanga kilometre 50 vela awm a ni.

Thlawhtheihna keh them hi French thuneituten Thawhṭanni khan an hmu a, Sala chuanna thlawhtheihna ni ngeia ngaih a ni a. United Kingdom leh a chhehvel chhiatna lam buaipui ṭhin Air Accidents Investigations Branch (AAIB) chuan kilometre 13 bial zawnna tur an tichiang a, amaherawhchu khaw awm dan leh tuipui dinhmun vangin kartawpah chauh a zawnna hi ṭan theih a ni ang.

AAIB hian tuifinriat mawnga thil awm zawnna atan hian 'sonar equipment' an hmang tawh dawn a, thlawhtheihna an biak pawh hnuhnun ber leh ṭhutna an hmuh inkar ve chu an zawn lai tur chu a ni.

Kum 28 mi Sala leh pilot David Ibbotson te hi January 21 khan Nantes aṭangin Cardiff panin an thlawhtheihna te 'Piper Malibu' hmangin an thawk chhuak a, English channel chunga an thlawh laiin biak pawh theih an ni lo.

Official-a Sala zawnna hi ni thum hnuah tihtawp a ni a, amaherawhchu €290,000 chuang zet an thawh khawm avangin a zawnna hi Inrinni khan lawng pahnihin chhunzawm a ni a, AAIB chan mimal sum thawh khawm hmanga zawng te nen ṭha an thawh tur thu a sawi a ni.