Bayern Munich-ah Coutinho a kal

Philippe Coutinho chuan tun season chhung loan hmanga cham turin Bayern Munich chu Barcelona aṭangin a pan fel, European club lian pahnih hian nimin khan Brazil international chungchangah inremna thuthlung 

an ziak fel.

Barcelona lamin thuchhuah an siam dan chuan German club-in an player an hawhsak manah pound maktaduai 7.78 an pe dawn; a loan hun chhunga a hlawh chu Bayern lam pek tur a ni bawk a, season tawpa a ngheta an la duh a nih chuan pound maktaduai 109.84-in an lei thei ang.

Nikum January thla khan Coutinho hian Liverpool aṭangin Barcelona chu pound maktaduai 142 zetin a pan. Catalan club tan hian match 76 a khelhah goal 21 a khungsak, a sulhnu a chhe hran lo. Mahse, fans lamin amaha theihna awm sang tak an lo beisei ang chu an hmu chhuak loah an ngai.

Nipui bazar chhungin club hrang hrang nen sawizawm a ni a, Barcelona hian Paris St-Germain aṭanga Neymar lakletna kawnga kal tel tur ang hialten thawm an awm hman. Tunah erawh engkim a chiang tawh - Premier League club ṭhenkhat nen pawha sawi zawm tawh hian Allianz Arena-ah tual a chai dawn.

Kum 27 mi Coutinho chuan, "European club ṭha berte zinga mi ka pan, ram hran daiha chona thar ka hmachhawn tur hian min ti lawm. Bayern ang club ropui kan zawm a nih chuan beiseina kan nei sang thei a, kan duhthusam a hlawhtlin chhoh ka beisei," tiin a sawi.

Franck Ribery leh Arjen Robben ten inkhelh an chawlhsan a, midfielder James Rodriguez chu a loan hun a zawh avangin Real Madrid lamah a kir bawk. Serge Gnabry leh Kingsley Coman te nen goal nawr turin hmun chan an inchuh ang - Bayern ti Bayern tu zinga mi Thomas Muller pawh Coutinho elpui tur zinga mi a ni thei ang.

Bayern chief executive Karl-Heinz Rummenigge chuan, "Philippe Coutinho hi kan lo be lawk tawh, a taka kan ti hlawhtling thei hi a lawmawm hle. FC Barcelona chungah lawmthu kan sawi, Philippe ang kan neih hi chuan kan goal nawr kawngah a thiamna leh theihna sang tak hmangin min pui ngei ang," a ti.