Medvedev tan ATP Masters 1000 title hmasa ber

Pathianni zan khan Cincinnati Masters hmawr bawk a ni a, mipa singles inelna lamah Daniil Medvedev chuan David Goffin 7-6(3), 6-4 a hnehin ATP Masters 1000 title a vawi khat nan a la.

Russian tlangval Medvedev hi tun hnaiah a khel ṭha thei hle. Citi Open leh Rogers Cup-ah final a lut a, inelna pahnihah hian nomawi a chawi zo lo - Cincinnati Masters lamah erawh amah khing zotu an awm lo.

North America rama hard court inelna hrang hrangah match 14 a khelh aṭangin vawi 12 hnehna a chang thei, tun thla tawpa khelh tur US Open-ah pawh player ngaihven hlawh tur zingah a tel ang.

Cincinnati Masters nomawi chawi tur hian semifinal-ah world number 1 Novak Djokovic a hneh, Serbian tlangval laka set khat a hloh bak chu tun inelna bika match ruk a khelh chhung hian a khingpuite straight set-in a hneh vek.

Kum 23 mi Medvedev chuan, "Ka lawmna hi thua sawifiah a har. Nomawi chawi lo chiahin ka tawp leh mai ang tih hlauhthawn a na duh hle, mahse a hun takah ka tan hlawhtlinna chu a rawn thleng ve ta mai a ni," tiin a sawi.

Tennis season hman laiah a tawp lam a ni tawh a, inelna lian Grand Slam phei chu khelh hmabak pakhat chauh an nei tawh. August 26 aṭang hian New York khawpuiah inelna hi an nei ang.