French champion PSG an tlawm

Paris St-Germain chuan Rennes laka goal an khung hum zo loin 2-1 in an tlawm. French Ligue 1 champion hian an thiampuipa Neymar chu an la chhawr lo zel a, Brazilian forward hma lam hun a chiang lo chhunzawm.

Season hmasa khan PSG hi league bikah vawi nga chiah an tlawm, an hnuai chiaha awm Lille lakah point 16 ngawtin an sang fal - an chak loh hi an champion tih a chian hnua mi deuh vek a ni, kuminah erawh beisei angin bul an ṭan lo hle.

Dan pangngaiin PSG an hlauhawm zawk, striker Edinson Cavani-a'n a tir lamah goal ban a tihper nghal dawp. Uruguay international hian a hun ṭha neih vawi hnihna a hlah lo, Rennes captain Damien da Silva-a backpass sual dawngin minute 36-naah goal hmahruai a khung.

PSG hi goal hnihna khung thei dinhmunah ding mah se Kylian Mbappe a vannei tawk lo. France rawlthar hian woodwork a pet per. Chawlhlawk hma chiahin Mbaye Niang-a'n an siphurh a sut a, second half tir lamah Romain del Castillo chuan chakna goal a khung zui bawk.

Rennes lamin goal thumna an khung teuh hle, defender Jeremy Gelin-a ball tauh chuan bar a per hlauh. PSG pawhin siphurh sut teuh viau ṭhin mah se Mbappe leh Cavani ten goal an sual chhuak zo tawh lo.

Season hmasa khan Rennes hian league leh French Cup-ah PSG hi an hneh ve ve a, league-ah 10-na dinhmun luahin an awmna inthlau viau mah se kuminah pawh Thomas Tuchel-a naute hian an ngam loh ngai hi an ngam lo leh ta.

Copa America khelh dawna inhliam Neymar chuan training zawm tawh mah se khelh tura tih a la ni lo, match hnih an khelh tawhah a la inlan lo. PSG manager Tuchel chuan a forward a la chhawr loh chhan hi a fit tawk loh vang niin a sawi.

Footballer manto ber Neymar hi a 'fit' tawk lo ang tih chu a rin theih. Chutihrualin Paris club neitu lamin a man phutawka hralhna an hria a nih chuan chhuahtir an hnial loh thu an sawi tawh; Spanish club lian pahnih Barcelona leh Real Madrid nen an sawi zawm mek.

PSG manager Tuchel chuan, "PSG team ṭha tak ka din dawn a nih chuan Neymar hi a tel ang, tun match bika a tel loh chhan chu 100%-in a la fit loh vang a ni," a ti. German coach hian a forward hi a thu ni se chuan chelh a duh ngeiin a rinawm.

Ligue 1 match hnih khelh tawh chinah Lyon, Nice leh Rennes ten point ruk ṭheuh an hmu a, goal difference nei ṭha ber Lyon chu hmahruaitu an ni. Lyon hian an player hlui Juninho Pernambucano chu sporting director hna an pe thar a, bul pawh an ṭan ṭha hle - AS Monaco 3-0 ngawta an sawp hnuah Angers 6-0 in an sawp leh bawk.

Arsenal captain hlui Cesc Fabregas awmna Monaco an chefuh hleithei lo. Season hmasa aṭanga talbuai tawh Leonardo Jardim-a naute hi Metz lakah 3-0 in an tlawm, an match hmasa zawka Lyon an hneh loh ṭumin Fabregas hnawhchhuah a ni a, tun ṭumah hian defender Ruben Aguilar chu minute 34-na lekah hnawhchhuah a ni thung.