Second Ashes Test-ah Australia an vannei

England chu second Ashes Test-ah an mikhual Australia aiin che ṭha zawk mah se ni nga chhunga chak zawk an awm loh avangin an inhnehtawk.

Ashes Test khelh mekah first Test latu Australia-in series-ah 1-0 in hma an hruai a,  third Test hi August 22-26 hian Headingley Stadium, Leeds-ah khelh a ni ang.

Australia-in vawm hmasak an thlang a, England-in first Test ang thoin beisei an pha lo. Opener Rory Burns-a'n run 53 siam a, Jonny Bairstow (52),  Chris Woakes (32) leh Joe Denly (30) te nen England hian first innings-ah run 258 an tlin pha chauh.

Aussies tan Pat Cummins, Josh Hazlewood leh Nathan Lyon ten wicket thum ṭheuh an la a, mikhual team hi chak nawn turin an dinhmun a ṭha. Amaherawhchu Australia an che ṭha bik lo, run 92 siamtu Steve Smith thlawp ṭha deuh chu Usman Khawaja (36) chauh a awm. 

England bowler Stuart Broad-a'n wicket li zet lain Australia hian run 250 chauh an siam. Second innings-ah England-in bul ṭan ṭha lo mah se World Cup hero Ben Stokes chuan thi loin run 115 zet a rawn siam a, mualneitu hian second innings-ah run 258/5 vaw chhuakin chakpui thamah ngaiin an duh tawk.

Australia-in chak turin over 48-ah 267 siam a ngai a, Test-ah chuan thil theih a nih loh avangin over 48 hman zawh theih chu an tum a ṭul.

England bowler Jofra Archer leh Jack Leach te an che ṭha a, over 14-ah wicket thum an la tawh. Aussies tan Marnus Labuschagne (59) leh Travis Head (42*) te rawn che ṭha a, mah se over 36-naah Leach-a'n Labuschagne a vawm hlum.

Over thum chhungin Matthew Wade leh Tim Paine te an vawm hlum lehnghal a, England hian beiseina tlem nei chho leh mah se wicket dang an la thei tawh lo.

Player of the match Ben Stokes chuan, "Century siam chu a nuam a, mah se chak chuang si loh chuan lawm a kim lo," tiin a sawi.

England captain Joe Root chuan, "Ben Stokes a khel ṭha a, chak tumin kan theihna zawng zawng chhuah mah ila a tawk lo. Australia-in an tihtur an ti tlat," tiin a sawi.

Australia captain Tim Paine chuan, "Team ṭha ni tur chuan second Test tawp lama hun harsa ang kha paltlang theih a ngai a ni. Leeds-ah third Test kan khel dawn a, ṭha zawkin kan inlan thei ang," tiin England an draw thei chu a lawm thu a sawi.