Super Frankie a 'Super' thei lo

Chelsea fan-ten, "Welcome Home Super Frank," tiin banner nen an legend lo lawm mah se Frank Lampard-a'n point thum nen a chhanglet thei lo. 

Pathianni zan khan Chelsea chuan an mikhual Leicester City chu 1-1 in an inhnehtawkpui a, Premier League-a an match hmasa pahnih aṭangin point khat chiah an la hlawh chhuak. 

Mason Mount chuan Blues tan a goal hmasa ber khung mah se Foxes hian Wilfred Ndidi hmangin an chhanglet a, goal dang a luh zui loh avangin hun tawpah point an insem. 

Chelsea boss Lampard chuan, "Fan-te min ṭawiawmna avangin ka lawm takzet. He hmunah hian hnehna chang tura lokal ka ni a, tun aia ṭha khan kan khel thei tih ka hria," a ti. 

Chelsea hi an match hmasa berah 4-0 ngawtin Manchester United lakah an mualpho a, UEFA Super Cup-ah Liverpool chu penalty hmangin an ngam lo zui. 

Hetichung hian Blues fan-ten kum 13 zet an club tan a khelh chhunga thil ropui tak tak lo tih sak tawhtu Lampard lam an ṭang a, banner tam tak keng chungin 'Super Frank Lampard' tiin an au rual. Chelsea fan-te thlawpna chhanglet turin kum 20 mi Mount chuan minute sarihna lekah goal a rawn khung nghal a, Wilfred Ndidi ball ken lai chhuhsakin 'cial' zetin a pet lut. 

Lawm avangin Lampard-a'n van lam hawiin boruak a hnek a, Derby County-a a enkawl hnu Mount-a goal khung a ni kher hian a lawmna a tizual ang. 

Chelsea-in goal khung hma viau mah se a chhunzawmna tur an nei lawk thei lo a, a hnuah an tawrh phah. 

Second half-ah Foxes an rawn ṭha sawt a, an phu ang ngeiin Ndidi chuan a tihsual thup nan minute 67-naah a rawn tauh lut. Cesar Azpilicueta leh Kurt Zouma ten an veng hneh tawk lo. Leicester tan ṭum dang ang bawkin James Maddison a hmuhnawm a, a ball sem a ṭha a, Chelsea tlarhnung vawi tam a chhaih mangang bawk. 

Foxes boss Brendan Rodgers chuan, "Tlarhnung aṭanga game din tura ka naute ka hrilh avangin kan goal chhuah kha chu ka thiam loh a ni. Kan chhanlet danah erawh ka lawm hle," a ti. 

Transfer bazar-ah Chelsea hrem an ni a, coach thar Lampard hnuaiah an khel bawk. England midfielder hlui hian an ṭhat dan tur ber an la zawn mek thu a sawi. 

Lampard chuan, "Bul kan ṭan ve chauh a ni a, hmachhawp kan neih avangin dawhthei taka kan nghah hram hram a ngai a ni," a ti. Kum 41 mi manager sawi angin Chelsea hi Lampard hnuaiah an indinthar mek a, mahse an indinthar chhung hi club dangin an tlanpel hun tur a ni miau si. 

Match hmasa pahnih aṭanga point li hloh nghal hi  Manchester City, Liverpool, Tottenham Hotspur, Arsenal leh Manchester United awmna league-a khel an nih avangin Chelsea tan a la pawi dawn chauh.

Chelsea-in Eden Hazard an ngai tih chu phat rual a ni lo a, Christian Pulisic hi player thiam tak ni mah se Hazard hmun ruak em chu a la luah thei lo niin a lang bawk. 

Tlarhmaah Lampard-a'n Olivier Giroud leh Tammy Abraham-ah hman tur zawk a la chiang lo a, Michy Batshuayi lah a rilru luahtu a ni lo tih a hriat. Lampard chuan, "3-0 vela hmahruai thei kan ni a, kan chance neih chhawr ila chu hma takah game titawp thei kan ni. Goal hmaah kan hriam a ngai," a ti. 

Blues-in hma an sawn dawn chuan tlarhnungah Azpilicueta, Christensen, Zouma leh Emerson ten insiamṭhat an mamawh a, Zouma erawh Antonio Rüdiger dam chian hunah a regular kher lo ang. 

Kum thum liam taa League One inkhel en ṭhin Sheffield United fan-ten Pathianni zan khan an mualah Premier League inkhel an en a, an mikhual Crystal Palace chu 1-0 in an hneh. 

2006-2007 season hnua a vawi khat nana Premier League khel club tan John Lundstram chuan goal awmchhun hi a khung. Kum 25 mi midfielder Lundstram hian England-a division hniam ber League Two aṭanga Premier League thlengin goal a khung kim vek ta!

Relegate leh mai tura rin Sheffield hian an match hmasa pahnih aṭangin point li an nei ta a, tun ang renga an khelh theih chuan relegate tur huanga dah chi an ni lo. 

Sheffield United    1 - 0    Crystal Palace

SHU: John Lundstram 47'

Chelsea    1 - 1    Leicester City

CHE: Mason Mount 7'

LEI: Wilfred Ndidi 67'