India leh Australia inhnehtawk

Olympic khelh tuma inbuatsaih mek India nula hockey khel thiam te chu Pathianni khan Australia nen 2-2 in an inhnehtawk, world number 10 India tan world number 2 Australia inhnehtawkpui hi result ṭha a ni.

Japan-ah Olympic Test Event hi neih mek a ni a, Oi Hockey Stadium-a inkhelah Australia lamin Kaitlin Nobbs (14') leh Grace Stewart (43') te hmanga an goal khung chu India tan Vandana Katariya (36') leh Gurjit Kaur (59') ten an chhang let.

Mizo tleirawl Lalremsiami Hmar telna India team hian an match hmasa zawkah a thlengtu Japan chu 2-1 in an lo hneh tawh a, an match hnuhnung ber atan vawiin tlai dar 4:30 hian China an hmachhawn leh ang.

Hockey huangah hian nakkuma neih tur Olympic khel tur a la chiang lo a, November thla aṭang hian qualifier khelh a ni ang. Tuna India team zin chhuak pawh hi qualifier khel tura inbuatsaihna zinga mi a ni.