FC Goa-in coach an ban

Indian Super League-a season duhawm tak an hman laiin FC Goa thuneitute leh coach Sergio Lobera thu a inhmu lo a, Spanish coach hi a hna aṭangin chawlhtir a ni. 

Lobera bakah hian assistant coach Jesus Tato leh Manuel Sayabera te pawhin an puanthuah telin ISL club hi an chhuahsan a, Goan club chet dan hian Indian football hrechiangtute mak tih a hlawh hle. 

Kum 43 mi manager hian June 2017 khan Indian club FC Goa hi a zawm a, Barcelona youth team coach hlui a nih avangin attacking football a ngaina a, Goan club khelh dan chu ISL-a mit ti tlai zingah a tel. 

Lobera hian season hmasa pahnihah khan FC Goa hi pathumna leh pahnihna a nihpui a, season hmasa khan final khel mah se Bengaluru lakah extra time-ah an tlawm a ni. 

Mahse, FC Goa hian a hnuah Indian Super Cup nomawi an chawi leh ta tho a, tun season ISL kal mekah league match 15 khel tawhin table chung ber an luah mek bawk.

FC Goa boruak hrechiangtute chuan Lobera leh club thuneitute inkar hi season ṭantir aṭang khan a khi ṭan tawh niin an sawi a, Spain-a pre-season an hmang thei lo leh transfer-a an bazar ṭha tawk lo chu Lobera hi a lawm lo. 

Hetihlai hian FC Goa thuneitu lam chu player naupang zawk ten chance an nei tam lo lutuk chu an lungawi lo nia sawi a ni ve bawk a, a tawpah a hnathawktu zawk ban a ṭul phah. 

Club lamin chiang takin la puang lo mah se FC Goa technical director Derrick Pereira chuan season tawp thleng atan coach hna a chelh lailawk dawn nia sawi a ni a, Mahindra United, Pune FC leh DSK Shivajians boss hlui hian top flight football-ah tawnhriat a ngah tawk tawh.