Badminton ranking a pangngain kal dawn
Thawhlehni zan khan Badminton World Federation (BWF) chuan world ranking an kalpui dan tur an ti chiang. March 17-a ranking ngai chu inelna an neih leh theih hunah pawh hman chhunzawm a ni ang.
Covid-19 vangin badminton inelna a awm thei rih lo a, Tokyo Olympic qualifier khelh hmabak an neih pawh an khel zo thei lo. Olympic chu nakkum atan sawn a ni a, player ṭhenkhat tan inlan beiseina a la nung.
Indian player zingah pawh Saina Nehwal, B. Sai Praneeth, Parupalli Kashyap leh H.S. Prannoy te hi an ranking pangngai ang chuan kal se Olympic khel phak lo tur an ni a, mahse ranking ngai nei sa chunga tournament an khel leh a nih chuan beiseina an la nei thei.
BWF chuan, "Thu leh awm hma chuan All England Open 2020 khelh zawh hnua ranking pangngai kha put tlang tur a ni. He ranking hmang hian tournament kan khelh leh theih hunah pawh seeding siam a ni ang," an ti.
Olympic khel phak turin ranking sang zual 16 zinga tel a ngai. Kumina inelna neih hmabak, Olympic qualifier zinga tel bawk - India Open (Super 500), Malaysia Open (Super 750) leh Singapore Open (Super 500) bakah ram leh ram inelna ho chu hri leng vangin an khel thei lo vek.