Indian shuttler-ten bul ṭan fuh

Badminton World Federation (BWF) World Championships 2019 chu Thawhṭanni aṭang khan Basel, Switzerland-ah khelh ṭan a ni a, Indian shuttler inlan hmasate an che fuh nghal hle.

Inelna neih ṭan ni hian Kidambi Srikanth, Sai Praneeth leh HS Prannoy ten singles match an khelhah hnehna an chang vek, doubles pair Jakkampudi Meghana leh Poorvisha Ram te pawhin hnehna changin second round an in vaw kai ve bawk.

World number 1 hlui Srikanth-a'n awlsam taka a hneh tura ngaih Nhat Nguyen chu 17-21, 21-16, 21-6 in a hneh hram. Praneeth erawhin game hloh loin Canadian tlangval Jason Anthony Ho-Shue chu 21-17, 21-16 in a hneh.

Inkhel dangah Prannoy-a'n game hmasa zawk a hloh hnuin Eetu Heino 17-21, 21-10, 21-11 in a hneh let, Meghana leh Poorvisha te ṭangdun chuan harsa lo takin Gautemala pair Diano Corleto Soto leh Nikte Alenjandro Sotomayor te chu 21-10, 21-18 in an hneh ve bawk a ni.