Pogba penalty hlah vangin Manchester United leh Wolves an inhnehtawk

Thawhṭanni zan Premier League inkhelah Manchester United leh Wolverhampton Wanderers 1-1 in an inhnehtawk.

United tana Anthony Martial goal hmahruai chu Wolves-in Reuben Neves goal mawi hmangin an chhanglet. Paul Pogba-a'n penalty aṭanga chakna goal khung theihna hun ṭha a neih chu Wolves keeper Rui Patricio-a'n hming ṭhat nan a hmang a, Ole Gunnar Solsjkaer hoten Molineux Stadium an tlawh hnuhnung pathumah chak an nei lo.

Tun season Premier League match hnih khelh tawhah Liverpool leh Arsenal chiah chak ve ve an awm a, champion lai Manchester City, Tottenham, United leh Chelsea te an khingpuite nen an inhnehtawk.

Manchester United-in ball an chang tam nghal a, amaherawhchu Wolves an inrem phui ṭhat avangin keeper Rui Patricio-a'n dan tur a nei lo.

Chutihrualin United-in pressure an pe ṭha a, Wolves pawhin an mualah awmze neiin ball an inpe kual thei lo. Mexican forward Raul Jimenez-a'n khawvel defender manto ber Harry Maguire nalh zeta a bum chu langsar mah se United tlarhnung a khawng ṭha a, keeper David de Gea a hahdam hle.

Minute 27-naah United number 9 Anthony Martial chuan striker goal a khung a, French forward hian Marcus Rashford aṭanga a ball hmuh chu vawi khatah pet nghalin Wolves keeper Patricio-a'n first half-a goal zawna kal awmchhun a chhuah.

Wolves-in goal khat an phur hnuah an khelh dan an thlak hret a, United lamin pressure an pek chhunzawm reng avangin an nawr nat phah lo. Martial bawkin chance ṭha a nei a, United forward hian Wolves defender Ryan Bennett back pass nang ching hman mah se Wily Boly tihbuai karah a hun ṭha a hloh. Hun chanve hma lamah keeper pahnihin save an nei lo.

Wolves manager Nuno Espírito Santo-a'n siphurh sut tumin tlan chak leh ball thiam Adam Traore a luhtir a, La Masia chhuak hi United tan a hnawksak pha.

Traore freekick hlawhchhuah aṭanga ball kal chu Raul Jimenez-a'n goal ban a tauh per a, hemi per let hian De Gea per lehin a goal teuh hle. Wolves ṭantute an phur a, United tlarhnung an buai. Minute 55-naah Reuben Neves chuan box pawn aṭangin crossbar perin a ti goal a, ball khawih fuh dettu De Gea-a tan dan theih a ni lo.

Goal hi VAR hmangin ennawn a ni a, Neves ball petu Joao Moutinho chu offside lo chiah chiahin goal-ah pawm a ni. Wolves ṭantute lawm a kim lo - Leicester City laka an goal khung pawmsak an nih tawh loh avangin VAR chungah an lungawi lo!

Solskjaer hote hian  season liam ta khan Wolves khelmual Molineux hi ṭum hnih an tlawh a, an chak lo ve ve.

Tun ṭumah hian Jesse Lingard-a'n second half ṭantirah 2-0 nih theihna hun ṭha a hlah a, hetah hian a tawp lo. Wolves-in siphurh an sut hnuah Paul Pogba-a'n a penalty hlawhchhuah chu goal-ah a chantir thei lo a, pre season friendly-a Manchester City chelhtu keeper Rui Patricio-a'n a dan sak.

Wolves hian counter attack hmangin United hi vaw let ṭhin mah se goal an khung thei bik lo. Portuguese manager Nuno hoten United a zawnin vawi thum hneh thei lo mah se 4-0 a Chelsea hnehtu Solsjkaer-a hote tan point khat hmuh hi lawmna tur a ni lo - Molineux mangchhiain a la chenchilh zel.

n    Martial-a'n English club tan goal 50-na a khung a, United tana hetiang zat khung thei 53-na a ni.

n    Wolves hi United laka match thum a zawna hnufual hmasa zawk chunga chak loh la tawng lo awmchhun an ni.

n    Season liam ta ṭantirh aṭang khan Paul Pogba hian United tan inelna hrang hrangah vawi 12 penalty a pet a; Wolves laka a hlah hma hian Burnley (Sep 2), Everton (Oct 28) leh Southampton (Mar 2) lakah a pet goal lo.

n    Marcus Rashford-a'n penalty vawi ruk (UEFA Youth League-a a pet goal chhiar telin) a pet tawh a la khung vek. United tan bik chuan Gigi Buffon-a venah PSG lakah chakna goal a khung a, Chelsea nen tun season Premier League match hmasa berah a khung bawk.