SAFF U15-ah Mizo pahnih
Vawiin chhun dar 12:00 hian SAFF Under 15 Championship chu Kalyani, West Bengal-ah khelh ṭan a ni dawn a, Mizo pahnih telna India U15 chuan Nepal nen an match hmasa ber an khel ang.
India U15 squad-ah hian Mizo rawlthar pahnih midfielder Amosa Lalnundanga leh forward Isac Zomuanpuia te an tel - player pahnih hian Aizawl FC tan I League U13 an lo khel dun tawh.
Thinghlun rawlthar Amosa hian Chanmari FC U15 tan pawh a lo khel tawh a, Isac hi Sihphir Venghlun FC tan Mizoram U15 League a khelh bakah National Sub Junior Football C'ship 2018, Kolasib-a neihah khan Mizoram tan a khel. Sihphir Arpu Veng rawlthar Isac hi Tata Trusts COE coach Colin Toal-a'n ṭha a tih avangin a lalut a, India team-a zawm tak avangin Mualpuia innghat COE-ah training a la nei lo.
SAFF U15-ah hian India bakah Bangladesh, Nepal, Bhutan leh Sri Lanka te an khel bawk a, an intum kual vek hnuah a sang pahnihin August 31-ah final an khel ang. Mipui 20,000 lenna Kalyani Stadium-in a thlen tur inelna hi https://mycujoo.tv-ah live streaming hmangin a en theih dawn.
India Squad
Goalkeepers: Aman Kumar Sharma, Mohit Singh, Ayush Deshwal.
Defenders: Paogoumang Singson, Shameek Caine Vas, Ranjan Soren, Amandeep, Pritam Meetei Sorokhaibam, Anish Mazumder, Halen Nongtdu.
Midfielders: Satvik Sharma, Sibajit Singh Leimapokam, Maheson Singh Tongbram, Renedy Meitei Yumnam, Aula Siba Prasad, Taison Singh Loitongbam, Ratanbi Singh Chaphamayum, Yoihenba Meitei Sukham, Amosa Lalnundanga.
Forwards: Himanshu Jangra, Sridarth Nongmeikapam, Shubho Paul, Isac Zomuanpuia.
Head Coach: Bibiano Fernandes.