Abraham-a'n Chelsea a chakpui

FA Cup-ah Chelsea-in Championship club Barnsley lakah harsa takin hnehna an chang a, Tammy Abraham-a goal hmangin 1-0 in an chak hram. Ningani zan inkhel dangah Southampton-in Wolves 2-0 in an hneh a, quarterfinal an lut ve bawk.

Oakwell Stadium-ah Barnsley-in Chelsea meuh mikhual mah se huaisen takin an hmachhawn. Callum Brittain-a'n goal ruak tih theih aṭangin pet mah se keeper Kepa Arrizabalaga-a'n a dansak. Barnsley hian goal khungna chance ṭha dang pawh nei mah se goal hmaah an vannei lo.

Chelsea erawhin hun ṭha an bawhpelh lo a, minute 64-naah James Reece-a cross chu Tammy Abraham-a'n a khung. English striker hian goal khung chauh duh tawk loin Barnsley tana substitute Michael Sollbauer goal khung tur chu goalline aṭangin a tauh chhuahsak bawk.

Chelsea boss Thomas Tuchel chuan, "Kan huaisen tawk lo a, goal venhim tumin kan tawm rei mah mah. Tun aia ṭha khan kan khel thei tih ka chiang a, ka naute pawh kha aia ṭhaa khel turin ka beisei a ni," tiin a khelh danah a lungawi loh thu a sawi. London club Thawhṭanni zan dar 1:30 hian Stamford Bridge-ah Newcastle United an mikhual ang.

Quarterfinal-a inhmachhawn tur pawh nghal a, Chelsea hi Sheffield United nen pawh fuh an ni. Manchester khaw club hmabak a harsa dawn. Man City-in Everton an lenchilh ang a,

Man United-in King Power Stadium-ah Leicester City an tlawh ang.

Southampton fixture a awlsam berah a ngaih theih a, Premier League club ni lo awmchhun Bornemouth nen an inkhel ang. FA Cup quarterfinal hi March 20-21, 2021-ah khelh tur a ni.