Nomawi chawi thei Flick

Germany-in FIFA World Cup 2014 an chawi khan Hansi Flick hi assistant coach a ni a, Bayern Munich chu a head coach-na hnuaiah FIFA Club World Cup-ah a champion pui leh bawk. 

Kum 55 mi Flick hi coach ni chung a, World Cup leh Club World Cup champion kawp thei hmasa ber a ni a. Bayern boss Flick chuan, "Season khat chhungin nomawi paruk kan chawi a, ka team-te ka lawmpui hle. Club hlawhtling tak Bayern Munich tan pawh season hlawhtling ber a ni hial," tiin a sawi.

Flick hian Bayern-ah chak percentage 85% a nei pha hial! Vawi 58 hnehna chanpuiin a khingpuite nen vawi nga an inhnehtawk a, vawi nga chauh an chak lo. An chak lohna zat aiin an nomawi chawi zat a tam zawk.

Bayern hian Flick-a ho hian Bundesliga, DFB-Pokal, Champions League, UEFA Super Cup, DFL-Super Cup leh FIFA Club World Cup-ah an champion. 

Brazil team enkawl mektu Tite hian 2002 khan Club World Cup-ah Corinthians a champion pui tawh a, 2022 World Cup-ah Brazil a champion pui thei. Zinedine Zidane pawhin 2016 leh 2017 khan Real Madrid a champion pui tawh a, an ram France hi engtik niah emaw chuan nomawi a la chawipui thei ang. Eng pawh chu ni se ram leh club champion pui hmasa ber chu Hansi Flick a ni.