Golden Ball dawngtu Lewandowski

FIFA Club World Cup-ah Robert Lewandowski-a'n goal khat chauh khungin top scorer ni lo mah se a phu ang ngeiin Golden Ball a dawng. Polish striker hian Al Ahly leh Tigres UANL an hneh ṭumin man of the match hlan a ni ve ve.

Lewy hian tun season match 28 aṭangin goal 28 a khung a, match tina 1.03 goal khung ang a ni. Bayern striker record hi ṭha viau mah se nikuma a goal khung dan match tina 1.17 goal a la pha lo.

Tigres UANL striker Andre-Pierre Gignac hnenah Silver Ball hlan a ni a, French striker hian final-ah goal khung lo mah se match hmasa pahnihah goal thum khungin top scorer a ni a, goal a khungna match hnihah hian top scorer a ni ve ve.

Germany international midfielder Joshua Kimmich hnenah Bronze Ball hlan a ni a, Bayern midfielder hian final-ah goal khung mah se offside vangin pawm a ni lo. Kum 26 mi Kimmich hi German chanchinbu ṭhenkhat chuan khawvel midfielder ṭha berah an chhal tawh hial.