#MiaSanChampi6ns Bayern-in nomawi paruk an chawi

Bayern Munich chuan season khat chhunga nomawi chawi theih zawng zawng chawi turin Ningani zan khan UANL Tigres chu 1-0 in an hneh a, FIFA Club World Cup nomawi an chawi.

Flick-a hote hian Bundesliga, DFB-Pokal, Champions League, UEFA Super Cup, DFL-Super Cup leh FIFA Club World Cup-ah nomawi an chawi vek a, Barcelona hnua 'Sextuple Champion' leh hmasa ber an ni.

Bayern defender pawimawh Jerome Boateng chu a bialnu hlui Kasia Lenhardt thihna avangin Munich-ah a haw a, final-ah a inlan thei lo.

Tlarhma lamah Bayern ti Bayern-tu Thomas Muller chu Covid-19 positive vangin thawn haw a ni bawk a, kum 31 mi Muller hi Munich-ah a inkhung hran ang.

Bavarians tana chanchin lawmawm erawh Ninganiah team pumpui test nawn leh vek an ni a, positive thar an awm belh lo.

Education City Stadium, Ar-Rayyan, Qatar-ah Bayern-in inkhel bul an ṭan ṭha a, inkhel pawh an thunun zawk. Minute 18-naah box pawn aṭanga Joshua Kimmich ball pet kawh ṭha zet chu goal-ah a lut a, amaherawhchu Robert Lewandowski offside vangin pawm a ni lo.

Polish striker hian ball a khawih fuh lo a, keeper Nahuel Guzman pawh a hliahin a lang lo. Mexican club an vannei a, VAR hmanga en let a nih hnuah Lewy hian keeper Guzman a ti buaiah an ngai. Tigres keeper Guzman hian Kingsley Coman goal khung tur a dansak a, Leroy Sane-a'n goal ban a pet per bawk.

Second half-ah Bayern an vannei a, minute 59-naah Kimmich-a cross chu Lewandowski-a'n tauhin keeper Guzman-a'n dang per mah se Benjamin Pavard zawnah tla thlain French defender hian chiang zetin a pet goal. Assistant referee-in Lewy hi offside-ah ngaiin goal hi pawm ni lo zet mah se VAR hmanga enlet a nih hnuah goal hi pawm a ni.

Tigres tan Colombian midfielder Luis Enrique Quinones leh French striker André-Pierre Gignac hlauhawm ve bawk mah se Niklas Sule telna Bayern tlarhnung an ding khawng a, goal an chhuah lo.