V-day lo kiang rawh; inkhel hmuhnawmin min hmuak!

Ṭhalai tam takin tun kar tawp nghahhlelh chhan an nei a, chu chu February 14, Valentine's Day a ni - football ngainatuten tun kar tawp nghahhlelh chhan dang an nei a, inkhel hmuhnawm en tur a awm vang a ni thung!

Zanin dar 6:00-ah Leicester City chuan Liverpool an mikhual dawn a, team pahnih hi top four-a season khar beisei an nih avangin inkhel a hmuhnawm loh ring suh. 

Foxes vs Reds a zo ang a, thil dang ngaihtuahna hun hman a awm dawn lo - zan dar 11:00-ah hmahruaitu Manchester City-in Tottenham Hotspur an mikhual zui ang a, mit a tlai leh dawn. 

Zanina match ngaihven hlawh pahnih hian Premier League season kal mek awm dan tur thui takin a hril thei dawn a, zanin result a zirin English top flight football hi a ngaihnawm zuiin a ngaihnawm zui lo thei. 

Liverpool-in hun thim an tawng mek a, an league match hnuhnung pahnihah an tlawm ve ve avangin champion an beiseina pawh a chuai tawh. Coach Jurgen Klopp berin top four chu an beisei tur a nih thu a sawi.

Liverpool talbuaina langsar tak chu tlarhnung laia Virgil van Dijk, Joe Gomez leh Joel Matip inhliam hi a ni a, Klopp-a'n a defender neih dang a rin tawk bawk si loh avangin midfielder Fabinho leh  Jordan Henderson a inkawptir ṭhin. 

January transfer-ah an ṭhat dan kan la hriat loh centre back pahnih Ozan Kabak leh Ben Davies-te chu Liverpool-in an lalut a, Reds fan-te chuan defender pahnih chhawra 'risk' la tawh turin Klopp an ngen. 

Liverpool fans duh angin Klopp hian thutlukna siam ta se, midfield pawp lutuk ṭhin thawm phui turin Hendo leh Fabinho an awm dawn tihna a ni a, tlarhma lam chu an ngaihtuahawm lo sawt ang -  fullback pahnih Trent Alexander-Arnold leh Andrew Robertson-ten goal nawr kawngah tlarhma an pui 'huai' leh sawt bawkin a rinawm. 

Klopp-a'n defender thar pahnih chhawr nghal a ngam a rinawm chiah lo a, Hendo hi midfield-ah chho leh pawh ni se Fabinho erawh tlarhnungah a la cham a rinawm a, mahse Brazilian midfielder leh Thiago Alcantara-te chu nimin thleng khan an training hmuh tur a awm lo. 

Hriat tel tur erawh Leicester City hi an chhe lo. Coach Brendan Rodgers hi Liverpool boss hlui a nih avangin Merseyside club hrechiang a ni a, Bunrley leh Brighton pawhin an hneh theih Liverpool tlarhnung ṭhiat turin Harvey Barnes, James Maddison leh Jamie Vardy a nei bawk. 

Chutihrual chuan Foxes hian Liverpool hi champion lai an nih ang ni lo a, Brighton leh Burnley hneh hnu anga an en chuan an tisual ang - he team hian Champions League leh Premier League-a Liverpool champion puitu player tam zawk an la kawl. 

Nilaini zan khan Liverpool coach Jurgen Klopp-a nu a thi a, German coach hi Covid-19 dan avangin a nu vuinaah a tel thei lo. Reds manager chuan, "Ka tan chuan engkim a ni," tiin a nu a thlah a, a nu tan chak a duh dawn tih ringhlel suh. 

Liverpool leh Leicester City inkhel result a zirin champion tura inum boruak a nung leh sawt thei a, a dul viau thei bawk - hei hian zan dar 11:00-a inkhel tur City leh Spurs player-te rilruah thui takin nghawng a nei thei ang. 

Manchester City-in an vanglai an hmang mek a, Tottenham Hotspur-in tun hnaiah an beisei ang result an nei thei lo thung - heti chunga Etihad Stadium-a lenluh hi Spurs tan chuan thil châkawm lo tak tur a ni. 

Pep Guardiola enkawl City hian an thiampuipa Sergio Aguero leh Kevin de Bruyne chhawr thei lo ṭhin mah se league match 10 chhung chu a zawnin hnehna an chang tawh a, an hneh zingah hian Chelsea leh Liverpool an tel. 

Phil Foden chu zaninah mipui mit fukna a ni leh dawn a, Riyad Mahrez, Raheem Sterling leh  Ilkay Gundogan-te mitthla tel phei chuan City hmachhawn hi a châkawm loh takzet. 

City-in hnehna an chan chuan champion lo chu an ngaihtuah tawh lo ang- Spurs erawh an tlawm a nih ngat chuan champion chu sawi loh, top four nih pawh a harsa tawh ang tih a rinawm a, Jose Mourinho-a'n hei hi thlentir a duh dawn lo. 

Pep leh a naute an 'form' em em laiin Spurs erawh inelna hrang hranga an match hnuhnung pangaah vawi khat chiah an chak a, vawi li dangah hian a tlawm zawkah an ṭang vek. 

Hriat tel tur erawh Mourinho-a'n an tlawmna match li zinga match hnihah chiah Harry Kane chu bul a ṭantir thei a, English striker hi a dam leh tawh avangin City-in Spurs team ṭha zawk an hmachhawn dawn tih an hriat a ṭul. 

Kane-a dam ṭhat chuan Son Heung-min 'ṭha ber' hmuhna chance a awm tel tih chu hriat sa a ni a, player pahnih hian an thiamna anga an khelhchhuah chuan City tan hna a awlsam lo ang.