Hawthorns-ah United lenglut dawn

February 14, Pathianni zan dar 7:30 hian Hawthorns-ah Manchester United leh West Brom an inkhel dawn. Ole Gunnar Solskjaer-a hote hian Old Trafford-ah Slaven Bilic enkawl Baggies hi 1-0 in an hneh hram a, tun ṭuma a hmachhawn tur erawh Sam Allardyce a enkawl an ni tawh ang.

West Brom hi Hawthorns-ah an khel ṭha ṭhin lo a, khualmual aiin an mualah an result a chhe zawk. Baggies hian an muala an match hnuhnung pangaah goal 19 an chhuah a, point khat chiah an hlawh chhuak. 

Big Sam-a hote hian Man United lakah an record duhawm loh hi tihtawp an tum dawn a, chutihrualin Norwegian manager Solskjaer-a hote hian champion an tum a nih chuan point an hlawhchhuah ngei a ṭul dawn.

United hian Paul Pogba an chhawr thei dawn lo a, defender Eric Bailly pawh January 20-a Fulham 2-1 a an hneh hnuah a la inlan leh lo. FA Cup-ah United hian extra time khelin Everton 1-0 in an hneh a, chakna goal khungtu Scott McTominay bakah Edinson Cavani ten inkhel bul an ṭan rinawm a, an intum hmasak zawka goal awm chhun penalty aṭanga khungtu Bruno Fernandes-a'n hmun pawimawh a chang leh ang.