Neymar a chawl rei dawn

Malpui hliam vangin Neymar chu chawlh kar li vel a chawlh a ngai dawn. Paris St-Germain leh Barcelona ten Champions League last 16 first leg an khelh hunah a inlan thei dawn lo a, second leg atan pawh a dinhmun a chiang ta lo.

Nilaini zan khan PSG hian French Cup-ah Caen an hneh, he inkhelah hian Brazilian forward hi a malpuiah hliamsak niin minute 60-naah lak chhuah a ni. A dinhmun en dik a nih hnuah a chawlh chen tur hi an puang.

French champion hian kar leh Thawhlehni zan hian Nou Camp-ah Barcelona an tlawh dawn, chumi hma inbuatsaih nan zanin dar 9:30 hian table hnuai lama awm Nice an mikhual dawn a ni.

Neymar hian hliam a nei fo, tun ṭuma a hliam hi khawthlang media-te chuan an sawi zui nasa. Kum 2014 hnu lamah kum tin tun ang hunah hian Neymar hi hliam emaw hrem emaw vangin a la inkhel thei lo ziah.

Kum 2015 leh 2016 khan hrem vangin February thla tawpah a lo chawl tawh. 2017, 2018 leh 2019 khan hliam vangin a lo chawl tawh bawk a, February thla chawhnu leh March thlatir lam hi Brazil khawpui Rio-a carnival neih ṭhin lai a nih bakah a farnu birthday hunlai a ni bawk.

Nikum tir lam khan Neymar hi a hliam lo, mahse PSG leh Bordeaux ten February 23-ah Ligue 1 match an khel a, inkhel tawp dawn minute 90+2-ah Neymar hian ṭul lo taka yellow card pahnihna hmuin hnawhchhuah a lo ni zui a, a duh hunah a chawlh theih phah tihna a ni.