Inkhelh chhawk a ngai - Pioli

AC Milan manager Stefano Pioli chuan tun hnaiah match khelh tur an ngah thu a sawi a, hlawhtlinna chan an duh bawk si avangin player ṭhenkhat chu an inlan chhawk a ngaih thu a sawi.

Serie A hmahruaitu hian zanin dar 1:15 hian Spezia an lenchilh dawn. February 18 zanah Europa League last 32 khel turin Crvena zvezda an lenchilh dawn a, ni thum hnuah Inter Milan nen league match pawimawh an khel zui leh ang.

Pioli chuan, "Season chawhnu lam kan hmang ṭan a, inkhel pawimawh leh hautak takin min hmuak mek. Player zawng zawng inkhel turin inpeih vek se tih hi ka duhthusam a ni, an pawimawh dan a inang vek.

"A hmawr bawk fuh tur chuan fimkhur a ngai, chuvangin thiam taka kan insiksawi a ngai dawn. Inkhel pakhat chauh kan ngaihtuah thei tawh lo, hmabak atan ruahmanna kan neih tel a ngai," a ti.

Milan hian season kal laiah Spezia hi league match leh Coppa Italia-ah an hneh tawh, zaninah pawh rinkai zawk an ni ang. Defender Davide Calabria chu hrem vangin a inlan thei dawn lo a, Brahim Diaz leh Simon Kjaer te dinhmun a chiang lo bawk.